Аҟәа. Абҵарамза 11, 2024 шықәса. Аԥсныпресс. Аџьынџьуаа рҭоурыхтә ԥсадгьыл ахь рырхынҳәразы Аԥсны Аҳәынҭқарратә Еилакы ахантәаҩы Вадим Ҳаразиа зхадараҿы дыҟоу аԥснытәи аделегациа Сҭампыл иҟоу аԥснытәи акультуратә Центр аҿы ҳџьынџьуаа ирԥылеит, ҳәа адырра ҟанаҵоит Аҳәынҭкомитет апресс-маҵзура. Аԥсны ахаҭарнакцәа Ацентр анапхгаҩы Елиф Маршьани Сҭампыл инхо гәыԥҩык ҳџьынџьуааи иҿцәажәеит.
Аиԥылара иара убас рхы аладырхәит Бандырма ақалақь аҿы аҳәынҭқарратә университет аҿы аҵара зҵо Аԥснынтәи астудентцәа. Хылҵышьҭрала иублаау ақалақь ахада Дурсун Мирза Аԥснытәи астудентцәа рганахьала агәцаракра аарԥшуа ӷәӷәала адгылара риҭоит.
Астудентцәа ауниверситет аҿы рҵара апроцесс аҟынтәи ироуз ацәаныррақәа ртәы еиҭарҳәеит, Аԥсны аџьынџьуаа рырхынҳәразы Аҳәынҭқарратә Еилакы ахантәы Вадим Ҳаразиа урҭ шаҟа гәаартыла ирыдыркылаз, ақалақь ахадара аҟынтәи ироуа ацхыраареи адгылареи ртәы изеиҭарҳәеит.
Аиԥш-зеиԥшу аџьынџьуа рԥылара мҩаԥысит Бурса ақалақь аҿы иҟоу Аԥсны акультуратә Центр аҿгьы.
Ҭырқәтәылаҟа ицаанӡа Аԥсны аделегациа Египети Иорданиеи ирҭааит, араҟа урҭ убасҵәҟьа ҳџьынџьуааи иарбоу атәылақәа рофициалтә хаҿқәеи рԥыларақәа жәпакы мҩаԥыргеит.
Вадим Ҳаразиа иажәақәа рыла, аҭаарақәа рхықәкы хаданы иҟоуп – аҳәаанырцәтәи ҳџьынџьуаа рымадара ауп.
Каир имҩаԥысыз аиԥыларақәа рҿы Египет аҳҭнықалақь аҿы ҳџьынџуаа рҭоурыхтә ԥсадгьыл амадара, аԥсуа етнос атрадициақәеи акультуреи реиқәырхара, уҳәа азҵаарақәа рыӡбара иацхраало Аԥсны акультуратә Центр аартра азҵаара иалацәажәеит.
