Аҳәынҭқарра Ахада Аслан Бжьаниа атәыла аспорттә еилазаара аԥснытәи амҵәышәмпыл 100-шықәса ахыҵра инамаданы дрыдныҳәалеит.

«Аԥсуа мҵәышәымпыл шәышықәса ахыҵра шәыдысныҳәалоит. Ари акырзҵазкуа хҭысуп ахәмарҩцәеи, азыҟаҵаҩцәеи, абзиабаҩцәеи, иааидкыланы амилаҭтә спорт зегьы рзы. Агәахәара унаҭоит жәашықәсала ҳтәылаҿы ари аспорттә хкы аҭоурых аиқәырхара ахьалшаз иахьеиҳахахо инагоу ҳаспортсменцәеи ҳазыҟаҵаҩцәеи рыла ишьаҭаркыз ишьаху аиааирақәа рытрадциақәа! Амҵәышәмпыл ари аперспектива змоу аспортхкы  анаҩсгы, ирласны ахәыцра, истандартым аӡбамҭақәа рыдкылара зҭаху аинтеллектуалтә, акомандатә хәмарроуп. Машәыршақә иҟамлазар ҟалап,  аихьӡара змоу аполитикцәа, абизнесуаа, анапхгаҩцәа рӷьыраҩык рқәыԥшра ашықәсқәа рзы амҵәышәмпыл иахьыхәмаруаз» — ҳәа иазгәеиҭеит Аҳәынҭқарра Ахада.

Иара ҷыдала иазгәеиҭеит Аԥсны Аҩбатәи Ахада Сергеи Багаԥшь ихәыҷышықәсқәа инадыркны амҵәышәмпыл дшыхәмаруаз, Асовет Еидгыла ажәларқәа распартакиада аҿы Аԥсны еизгоу акоманда акаптанс дшыҟаз, Аԥсны жәлар Рџьынџьтәылатәи еибашьра ашьҭахь Аԥсны амҵәышәмпыл Афедерациа дшахагылаз. 

Аслан Бжьаниа иҭабуп ҳәа реиҳәеит аԥснытәи рколлегацәа ирыдныҳәаларц иааз ҳаҭыр зқәу асасцәа.  Иара амҵәышәмпыласыҩцәа зегьы аспорттә еихьӡарақәа, рыгәҭакқәа зегьы рынагӡара рзеиӷьаишьеит.

Аԥснытәи амҵәышәмпыласыҩцәа аиубилеитә рыцхә рыдиныҳәалеит Урыстәылатәи амҵәышәмпыл Афедерациа анагӡаратә директор Владимир Диачок:

«Урыстәылатәи амҵәышәмпыл Афедерациа ахьӡала ишәыдысныҳәалар сҭахуп аԥснытәи амҵәышәмпыл 100-шықәса ахыҵра. Асоветтә спорт алегендақәа аӡәырҩы иазгәарҭон шаҟа акыр аҵанакуаз аолимпиатә хәаррақәа, адунеи ачемпионатқәа рҽазыҟаҵарақәа Аԥсны амҩаԥгара. Сара агәра сготи атрадициақәа шеиқәырхахо, насгьы ишацҵахо. Ҳаицхырааны Урыстәылеи Аԥсни амҵәышәмпыл аҿиара иазкны аусура мҩаԥаагалоит. Аҩызцәа, гәык-ԥсыкала ишәыдысныҳәалоит аԥснытәи амҵәышәмпыл 100-шықәса ахыҵра!» - ҳәа иҳәеит иара.  

Владимир Диачок Аслан Бжьаниа Урыстәылатәи амҵәышәмпыл Афедеациа ахьӡала иаашьҭыз адныҳәаларатә цҳамҭа ииҭеит.

«Иара убас, Аԥсны аҿари аспорти русқәа рзы Аҳәынҭеилакы ахантәаҩы Ҭарашь Ҳагба Аԥсны амҵәышәымпыл шәышықәса ахыҵра иазку аусмҩаԥгатә аҿы адныҳәаларатә ажәахә ҟаиҵеит.

«Сара алшара сымоуп аныҳәа ду – Аԥснытәи амҵәышәымпыл шәышықәса ахыҵра шәыдысныҳәаларц. Шәышықәса ҳхыҵит, жәаҳәарада, аизҳарақәеи аиҵахарақәеи ҳархысхьеит. Аха ҳара ҳзы ауадаҩра дуқәа аныҟазгьы ҳааигәа иҟан ауаа, ԥхьаҟа ацаразы иҳацхраауаз, иҳавагылаз», — ҳәа иазгәеиҭеит иара.

Ҳагба иҳәеит Александр Седов, Владимир Ҳашба реиԥш иҟоу зҟазара ҳараку азыҟаҵаҩцәа рыда иарбанзаалак аспорт хкы аҿиара шзалымшо.

«Атәыла анапхара ахь идуӡӡаны иҭабуп ҳәа сҳәар сҭахуп Владимир Ҳашба инышәынҭра аҭеиҭыԥш арҽеира азы алшара иҳанаҭаз азы», –  ҳәа иҳәеит Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба.

«Ааигәа, мышқәак раԥхьа, Алеқсандр Седов, Владимир Ҳашба ахьынхоз аҩнқәа рхаҿратә ган аҿы амемориалтә ӷәқәа шьақәыргылан. Хазы иҭабуп ҳәа сҳәар сҭахуп Аҟәа ақалақь Ахадареи Аҟәатәи ақалақьтә Еизареи уи азы аӡбамҭа ахьрыдыркылаз» – ҳәа иҳәеит Ҭарашь Ҳагба.

Аиубилеи аҳаҭыр азы Ҭҟәарчал ақалақь аҿы амҵәышәпылтә плошьадка аартын.

«Шәышықәса ирҭагӡаны иҟалаз ахҭысқәа рацәоуп. Ҳара даараӡа ҳаигәырӷьоит иахьа ҳара ԥхьаҟа ацаразы, аҿиаразы алшара ахьҳамоу. Аиубилеитә ныҳәатә усмҩаԥгатәқәа рахь иахьа иаҳзааит хыԥхьаӡара рацәала асасцәа – ҳара ҳҩызцәа, ҳара уи адаара пату ақәаҳҵрит», - ҳәа иҳәеит Ҭарашь Ҳагба.  

Аԥсны Амилаҭтә Олимпиатә комитет апрезидент Валери Аршба аԥсуа спорт аҭоурых атәы еиҭеиҳәеит: 

«Аԥсуа спорт аҭоурых — ари иналукааша аихьӡарақәа, ҳтәылауаа рыпрофессионалтә лшарақәа ашықәсҩыра ауп. Зыхьӡ нагоу Аԥсны аспортмсенцәа рҟыбаҩи рҟазареи еиуеиԥшым ахырхарҭақәа рыла иалкаахон – атлетика лас, ихьанҭоу атлетика, ашьапылампыл, анапылапыл, амҵәышәмпыл, абокс, уҳәа егьырҭ аспортхкқәа жәакы рҿы. Аԥсны ахааназгьы адунеитә спорт аперефириа аҿы иҟан, ҳара аиашазы зыхьӡ нагоу ҳџьынџьуаа ҳрызгәдууп. Аԥсуа спорт ааӡамҭацәа аолимпиатә хәмаррақәа жәаба рхы аладырхәхьан. Сара агәра ганы сыҟруп иахьа еиҵагыланы иҟоу аспортменцәа рабиԥара ҿыцгьы реиҳабацәа реихьӡарақәа хьыӡла-ԥшала ацҵара шрылшо!».

«Амҵәышәмпыл — ари даара иԥшӡоу, угәылазхало  акомандатә хәмарроуп.  Аӡәырҩы амҵәышәмпыл ампыл ала ахәмаррақәа рҿы иреиӷьу хәмарроуп ҳәа ирыԥхьаӡоит. Амҵәышәымпыл, аиашазы аԥшӡарала ашьапылампыли анапылампыли акала иаҵахо иҟам. Иахьатәи амш азы Аԥснытәи акомандақәа активла жәларбжьаратәи атурнирқәа рхы аладырхәуеит.  Сынтәа инаркны Урыстәыла аспорт Аминистрреи Урыстәыла амҵәышәмпыл Афедерациеи иҟарҵо адгыларала амҵәышәмпылтә Клуб «Аԥсны» Аладатәи Афедералтә Округи Нхыҵкавказтәи Афедералтә Округи рчемпионат рхы аладырхәуеит. Уи, жәаҳәарада,   аспортсменцәа агәазҭазаара ду рнаҭоит, ргәы шьҭнахуеит, иааизакны Аԥсны  амҵәышәмпыл аҿиаразы астимул аԥнаҵоит», – ҳәа иҳәеит Аԥсны амҵәышәымпыл Афедерациа ахада Ерасҭ Агәмааа. 

Аахыҵ Уаԥстәыла амҵәышәмпыл Афедерациа апрезидент Ҭаимураз Гогинов убасҵәҟьа аԥснытәи иколлацәа дрыдныҳәалеит.

«Аԥсны амҵәышәмпыл 100-шықәса ахыҵратәи аиубилеи – ари аспорттә еихьӡарақәеи хра злоу атрадициақәеи рыла игәылҭәаау аепоха ауп. Ҳара ҳтәылақәа акырӡа зхыҵуа иӷәӷәоу аиҩзареи аусеицуреи рыла ишьаҭарку аимадара рыбжьоуп, уи даара иӷәӷәоу аҿиара адинамика амоуп. Ҳара аринахысгьы аԥышәеимадара, аусеицура ҳабжьазаауеит. Ҳара ҳамҵәышәымпыласыҩцәа Урыстәыла еиԥш Аԥсынгьы имҩаԥысуаз аицлабрақәа ирылахәын, ҳара иаабоит уи алҵшәақәа.   

Аԥснытәи амҵәышәмпыл иазеиӷьасшьоит еиҳа апопулиалра зҵоу аспортхқәа рхыԥхьаӡараҿы аанхара, иҿыцу аихьӡарақәеи аҟыбаҩ злоу ахәмарыҩцәеи, иааидкыланы аманшәалареи ахирреи», – ҳәа иҳәеит иара.

Аԥснытәи амҵәышәмпыласыҩцәа авидео-дныҳәаларақәа рзаарышьҭит Мельбурн, 1956 шықәсазы  аолимпиатә чемпион, ԥшьынттәны ачемпион, Асовет Еидгыла Ахраҿа ҩынтә изгахьаз ашьапылампыласҩы, москватәи «Спартака» ажәылаҩ-абомбардир Никита Симониани  Урыстәыла амҵәышәмпыл Афедерациа апрезидент Андреи Кириленкои.  

Даара ажәа ҟәандақәа рацәаны аԥснытәи амҵәышәмпыл азы ирҳәеит аолимпиатә чемпион, Асовет Еидгыла Зҽаԥсазтәыз  азыҟаҵаҩ Евгени Гомельски, Алада Урыстәыла Аолимпиатә Академиа авице-президент Алеқсандр Банников, «Росэнергоатом» адиректор Хада актәи ихаҭыԥуаҩ  Џьумбер Тҟьебучаа.

Аконференц-зал уахьыныҩнало аԥхьа еиҿкаахеит еиуеиԥшым ашықәсқәа рзы аԥснытәи амҵәышәмпыл акомандақәа рфотоцәыргақәҵа.  Арҭ афотосахьақәа кьыԥхьуп аԥснытәи амҵәышәмпыл 100-шықәса ахыҵра азы иҭыжьыз ашәҟәы «Вперед и вверх» аҿы.

Аԥсны амҵәышәымпыл Афедерациа ахада Ерасҭ Агәмааи Урыстәыла амҵәышәымпыл Афедерациа анагӡаратә напхгаҩы Владимир Диачоки аусеицуразы Амеморандум рнапы аҵарҩит.

Иара убасгьы Аԥсни Аахыҵ Уаԥстәылеи амҵәышәымпыл азы р-Федерациақәеи Урыстәылеи Аахыҵ Уаԥстәылеи р-Федерациақәеи аиқәшаҳаҭрақәа рыбжьарҵеит.

Иахьа иара убас имҩаԥгахеит Аԥсни Урыстәылеи аветеранцәа ркомандақәа рыбжьара аиҩызаратә матч. Уи аҩ-командак реиҭахарала ихыркәшахеит.

Раԥхьаӡа амҵәышәмпыл асырҭа Аҟәа иаадыртит 1924 шықәсазы. Убри инаркны амҵәышәмпыл Аԥсны аспорттә ԥсҭазаара иахәҭакны иҟалеит, еиҿкаахеит амҵәышәмпыл азы амилаҭтә школ, ареспублика аспортсменцәа Асоветеидгылазегьтәи аицлабрақәа рхы рыладырхәуан.