Иара Аԥсны усҟантәи анапхгаҩы Борис Адлеиба ари хра злоу аус ду аҿы хаҭала илага азгәеиҭеит.  

Атәыла ахада ишазгәеиҭо ала, ателехәаԥшреи арадиои рыҟны аусура иаҭахуп арҿиаратә знеишьа, ахамеигӡара. «46 шықәса инарзынаԥшуа Аԥсуа телехәаԥшра қәҿиарала анапы иану анагӡара иаҿуп. Шәара шәыпрограммақәеи шәрепортажқәеи аԥсуа уаажәларра рыԥсҭазаара иузаҟәымҭхо иадҳәалоуп. Шәара ауаажәларра ирышәҭо аинформациа инаваргыланы ишәылшоит ҳмилаҭтә хаҿра аиқәырхарагьы, ари, хымԥада, жәлар ртелехәаԥшраны аҟаҵара агьалнаршоит уҳәар ҟалоит. Шара шзанааҭ акыр иуадаҩуп, уи зызку ауаажәларра рҟынӡа обиектвла ииашоу аинформациа рызнагара . Шәара шәколлектив убас ала аус ауеит. Аринаххысгьы ишәзеиӷьасшьоит ишахәҭоу ала, аҩаӡара ҳаракы аҿы шәзаанаҭтә уалԥша анагӡара», - ҳәа иҳәеит Аҳәынҭқарра Ахада.

«Ари амш аҽны ҷыдала иҭабуп ҳәа расҳәарц сҭахуп Аԥснытәи Ателерадиоеилахәыра иахьатәи аколлектив адагьы, уи ашьақәгылара ахыҵхырҭаҿы игылаз, уи ашьақәгылареи аҿиареи иадҳәалоу ау аҿы акыр аџьабаа збаз», - ҳәа иациҵеит Аслан Бжания.

Иара еизаз агәра диргеит атәыла анапхгара аринахысгьы Аҳәынҭқарратә Телерадиоеилахәыра адгылара аҭара азы алшара рыԥшаара азы иалшо зегьы шыҟанаҵало. 

Аҳәынҭқарра Ахада иааиуа 2025 шықәса рзы Ателерадиоеилахәыра аусзуҩцәа руалафахәы ацҵақәа шроуло азы адырра ҟаиҵеит. 

Ателерадиоеилахәыра адиректор Хада Ирина Агрба Аҳәынҭқарра Ахада иҭабуп ҳәа иалҳәеит ари аԥснытәи ателехәаԥшра аусзуҩцәа рныҳәамш азы иара хаҭала аколлектив дрыдныҳәаларц дахьааиз азы.  

Ирина Агрба аҳәынҭқарра анапхгареи хаҭала Аҳәынҭқарра Ахадеи аканал атехникатә еиқәыршәареи ателехәаԥшратә студиақәа реиҭашьақәыргылареи рҿы ироуз ацхыраара азы  иҭабуп ҳәа лҳәеит.  

Аҳәынҭқарра Ахада аинформациатә атематикатәи программақәеи ашьыжьтәи адырраҭарақәеи рзы ирҿыцыз астудиақәа дырҭааны рҭагылазаашьа гәеиҭеит.  

Аслан Бжьаниа  убасҵәҟьа амилаҭтә радио аусура аҭагылазаашьақәа зеиԥшроу гәеиҭеит.

Аслан Бжьаниа Аԥснытәи аҳәынҭқарратә телерадиоеилахәыра аколлектив ирзеиӷьеишьеит арҿиаратә гәазыҳәареи аихьӡарақәеи.