Алеко Гәарамиа, Аԥснытәи аҳәынҭқарратә Университети Приднетровтәи аҳәынҭқарратә Университети рыбжьара акыр шықәса раахыс аиҩызаратәи аимабзиаратәи аизыҟазаашьақәа шақәгыланы иҟоуп ҳәа иазгәеиҭеит. Ауниверситетқәа ишиашоу еиԥш, иҿыцӡоу ихьыԥшым аҳәынҭқаррақәа руниверситетқәа Рассоциациа аҳәаақәа ирҭагӡангьы аусеицура арҿиара иаҿуп. Ас еиԥш аусеицуратә еизыҟазаашьақәа рышьақәыргылара аус аҿы илагала дууп Приднетровтәи аҳәынҭқарратә Университет ԥыхьатәи аректор, афизика-математикатә наукақәа рдоктор, апрофессор Степан Берил.

«Иахьа иҟоу имариам аҭагылазаашьақәа рҿы ҳара ҳзы акырӡа аанагоит аҵараиурҭабжьаратәи аусеицура, ҳколлегацәеи ҳареи ҳаимадара. Уи иаҳзаанартуеит иҿыцу алаԥшҳәаақәа, ҳусура аҳәаақәа арҭбаауеит», – ҳәа иазгәеиҭеит Приднестровтәи аҳәынҭқарратә Универитет аректор Владислав Соколов.

Приднестровтәи Молдатәи Ареспублика адәныҟатәи аусқәа рминистр ихаҭыԥуаҩ Алеқсандр Стециук, ауадаҩрақәа маҷымкәа ишыҟоугьы, Аԥсни Приднетровиеи рыжәларқәа еимадоуп, аимабзиаратә еизыҟазаашьақәеи аусеицуреи рыбжьоуп ҳәа инаҵшьны иазгәеиҭеит.

«Ҳаргьы шәара шәеиԥшҵәҟьа Урыстәылатәи Афедерациаеи ҳареи ҳзы иаку амедиатә ҵарадырратәи анаукатәи аҵакыра аҿы ҳаҟоуп. Уи ганкахьала аҭакԥхықәра ду ҳаднаҵоит, аха даҽа ганкахьала инарҭбаау алшарақәа ҳанаҭоит. Ҳара, жәаҳәарада, уи даара гәахәарыла иҳадаҳкылоит», – ҳәа илҳәеит ААУ анаука азы апроректор Џьулиетта Адлеиба.

Лара ауниверситетқәа русеицура аҳәаақәа ирҭагӡаны есышықәса анаукатә ҭыжьымҭа аицҭыжьра азы ажәалагала ҟалҵеит.

Аганқәа ргәаанагарақәа еибырҳәеит, анаҩстәи аусеицура иадҳәалоу азҵаарақәа жәпакы ирылацәажәет,  апроектқәа реицынагӡара аперспективақәа ирзааҭгылеит..

Аиԥылара ахыркәшамҭаз Алеко Гәарамиеи Владислав Соколови Аԥснытәи аҳәынҭқарратә Университети Т. Г. Шевченко ихьӡ зху  Приднестровтәи аҳәынҭқарратә Университети русеицура азы ирҿыцу Аиқәшаҳаҭра рнапы аҵарҩит.

Аиԥылара иара убас рхы аладырхәит атәыла адәныҟатәи аусқәа рминистр Сергеи Шамба, Аԥсны иҟоу Приднестровтәи Молдавтәи Ареспублика аофициалтә Хаҭарнакра ахада Гарри Кәпалба,  Аԥсны Аҳәынҭқарра ԥыхьатәи Ахада ихаҭыԥуаҩ Валери Аршба, ААУ актәи апроректор Роман Дбар, жәларбжьаратәи аимадарақәеи аекономикатә зҵаарақәеи рзы ААУ апроректор Максим Ӷәынџьиа, аргылареи анхамҩатә усуреи рзы ААУ апроректор Асҭамыр Џьыкырба, ААУ аректор  ицхырааҩ  Анжела Қаџьаа.