Уажәазы «Амшынеиқәафымцамч» аҟазауаа 21 шьаҟа дыргылеит, зымчхара 160 кВА иҟоу атрансформатор ықәдыргылеит. Иҿыцу афымцацәаҳәа анаӡара километрак аҟынӡа инаӡоит. Ахра Гагәылиа иажәақәа рыла, анаҩстәи аусурақәа рыхәҭа — ацәаҳәақәа рнагароуп, уи иабзоураны афымцацәаҳәақәа рҿы еиԥҟьарада иҭышәынтәалоу, иҳараку амчхара аиура алыршахоит. Аусурақәа рынагӡара иалагеижьҭеи шьҭа мызкы аҟара ҵуеит. Аусурақәа рзы аԥара азоужьуп ареспубликатә биуџьет аҟынтәи, урҭ рхыркәшара азԥхьагәаҭоуп иааиуа амчыбжь аҩныҵҟа.
Ақыҭауаа ас еиԥш ихымԥадатәииз хра злоу аиҭакрақәа рзы Аҳәынҭқарра Ахадеи атәыла анапхгареи иҭабуп ҳәа рарҳәоит. Аҭыԥантәи анхаҩы Фарид Кобахьиа ақыҭатә ԥсҭазаара аҿиаразы аинфраструктура иаҵоу аҵакы ахадара азгәеиҭеит.
«Аԥсуа нхаҩы ҭынч дынхо-дынҵо иҟаларц азы уи инхараҿы ибзиоу афымцамчи амҩеи аӡи имазар ахәҭоуп», – ҳәа иҳәеит Фарид Кобахьиа. Иара афымцамч иадҳәаланы иҟаз ауадаҩрақәа жәашықәсала аӡбашьа аиуӡомызт ҳәа инаҵшьны иазгәеиҭеит.
«Афымцацәаҳәақәа рырҿыцра иадҳәалоу аусурақәа – ари Лыхны ақыҭан аԥсҭазаара аҭагылазаашьақәа реиӷьтәра иазырханы иазԥхьагәаҭоу аусмҩаԥгатәқәа рыхәҭа ауп. Араҟа иара убас амҩақәа реиҭашьақәыргылареи аинфраструктура арҿыцреи мҩаԥысуеит», – ҳәа иазгәаҭоуп Аҳәынҭқарра Ахада ипресс-маҵзура иҟанаҵо адырра аҿы.
