Ахрик Цәеиба дықәгылон «Хабаровск Аспорттә арратә Клуб азы, акомандақәа «Динамо» Тбилиси, «Динамо» Киев, «КамАЗ»  Набережные Челны, «Гамба Осака» Иапониа, «Аланиа» Владикавказ, «Пудонг» Китаи, «Уралан» Елиста, «Динамо» Москва реилазаара аҿы.

Асовет Еидгыла ачемпионатқәаа рҿы Ахрик Цәеиба имҩаԥигеит 123 матч, амба иҭаиршәит 1 гол, киевтәи «Динамо» азы - 91 матч, иҭаиршәит 2 гол. Урыстәыла ачемпионатқәа рҿы - 11 матч.

«Атренировкақәа рҿы, ахәмаррақәа раан ашьапылампыл изы иҟамзароуп авторитетқәа. Иҟоу акызаҵәык ампыл, аиндаҭлаҩ, ашьапылампыл аԥҟарақәа роуп», – ҳәа иԥхьаӡоит Ахрик Цәеиба.

Ахрик Цәеиба – Европа ачемпионат - 1992ш.  далахәын (8 матчк мҩаԥигеит, урҭ рахьынтә 2 -  афиналтә турнир аҿы). Москва ақалақь 850-шықәса ахыҵреи, урыстәылатәи ашьапылампыл  100-шықәса ахыҵреи ирызкны Урыстәыла еизгоу акоманда аиҩызаратә ацхәмарраан ФИФА еизгоу акоманда аилазаара далаҵан (18.08.1997 ш., Урыстәыла – ФИФА,  0:2).

1990 шықәса рзы  Ахрик Цәеиба Асовет Еидгыла еизгоу акоманда ахь ааԥхьара ииҭеит уи азыҟаҵаҩ хада Валери Лобановски, уи усҟан иара убас киевтәи «Динамогьы» дахагылан. Иара еизгоу акомандазы дыхәмаруан уи Анатоли Бышовец данахагылазгьы. Зынӡа еизгоу акоманда азы дыхәмарит 17 матч. Аха нас ари акоманда аԥыххеит. Иоуз ахәахәара иахҟьаны 1990 шықәсазы имҩаԥысуаз ачемпионат ихы изаламырхәӡеит.

Ашьапылампыласҩы икариера хиркәшеит 2001 шықәсазы москватәи «Динамо» аҿы.

Рашәарамза 12, 2024 шықәсазы, Казань ақалақь аҿы, Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа аартра иадҳәалаз аныҳәатә церемониа аҿы Ахрик Цәеба Ареспублика Аԥсны аҳәынҭқарратә бираҟ кны аԥснытәи аспортсменцәа драԥхьагыланы аренахь дцәырҵит.