Брианшьина ауааԥсыра Аџьынџьтәылатәи еибашьара Дуӡӡа аан афронтқәа зегьы рҿы еибашьуан, иара убас апартизанцәеи агәыԥмаӡақәеи реилазаараҿы афашистцәа ирҿагыланы иқәԥон.  Афашистцәа рыла Бриансктәи аобласт аокупациа аназуз аамҭазы иршьит, иара убас абомбалажьрақәа раан иҭахеит  75 274 – ҩык аҭынч уааԥсыра, анемецтә хәура ахь иалцаны ишьҭын  154 нызықь ҩык инарзынаԥшуа, иблын 1016 нхарҭатә пунктқәа. Брианшьина аокупациа аамҭа иалагӡаны, нанҳәамза  8, 1941 шықәса инаркны цәыббрамза 28, 1943 шықәсанӡа, уи атерриториа аҿы иаԥҵан иҭҟәаз аибашьҩцәа рлагерқәа 7, аҭынч уааԥсыра рзы алагерқәа 7, абахҭақәа 5, агеттоқәа 2. Амемориалтә комплекс «Апартизанцәа рыдәҳәыԥш» Бриансктәи абна, аӡиас Снежеть аԥшаҳәаҿы игылоуп.  Уаҟа апартизантә қәԥара иазку астела гылоуп, иара убас иҭахаз рыхьӡқәа зну агәалашәаратә аҭӡи аџьаз иалху асимволикатә ҟазшьа змоу аскульптурақәеи  шьақәыргылоуп, апартизантцәа зыҩназ анышәҩнқәа рреконструкциа, арратә техника аекспозициа, уҳәа убас иҵегьы. Акомплекс иахьаҵанакуа иҟоуп аӷа ила аокуппациа зызуз Бриансктәи аобласт аҿы зымҽхак ҭбааз апартизантә қәԥара Амузеи.

Бриансктәи апартизанцәа реилазаараҿы еибашьуан 60 нызықь ҩык, урҭ 129 отряд еиднакылон.

Брианск афашистцәа ракупациа аҟынтәи ахы иақәиҭтәын цәыббрамза 17, 1943 шықәса рзы.

Аҟәа ақалақь аделегациа иара убас иддырбеит асквер «Аиааира абаҳча», уи аԥҵан 2021 шықәсазы. Апроект аԥшьгаҩ – ақалақь ахада Марина Дбар.  Абаҳча ахь инагоуп 145 шьапҿаԥса змоу Брианск ахаҳәтә мардуан хада.