Ашкол N2 ахыбра ргылан 60 шықәса раԥхьа, иара ашкол ахаҭа шәышықәса реиҳа ахыҵуеит.
Аҵарашықәс ҿыц аламҭалазы араион Ахадара ахарџь ала араҟа иҟаҵан аанда ҿыц, ишьақәыргылан арлашаратә система бзиа.
Аныҳәатә цәаҳәақәгылара аҿы ашкол адиректор Илона Дамениа еизаз игәырӷьаҽҳәашоу ажәабжь ралҳәеит. Аԥхынтәи аԥсшьраамҭақәа раан 2023-2024шш. рзы 29-ҩык ашкол аушьҭымҭацәа Аԥсны, Урыстәыла, Ермантәыла еиуеиԥшым аҵараиурҭақәа ирҭалеит. Москва, Санкт-Петербург, Ростов-на-Дону, Шәача, Петрозаводск, Ставрополь, Воронеж, Ереван, уҳәа егьырҭ ақалақьқәа жәпакы раԥхьаҟа аруааны, инџьнырцәаны, изиндырҩцәаны, ифизикцәаны, иматематикцәаны, аҩныҵҟатәи аусқәа Рминистрра асистема аспециалистцәаны иҟалараны иҟоу ҳҿар рыдыркылеит.
