Аҟәа. Нанҳәамза 31, 2024 шықәса. Аԥсныпресс. Гәылрыԥшь араион Маҷара ақыҭан зыԥсадгьыл ахь ихынҳәыз 24 ҭаацәара ауада ҿыцқәа рцаԥхақәа роуит. Абри азы адырра ҟанаҵеит Аԥсадгьыл ахь ахынҳәразы Аҳәынҭеилакы.
Гәылрыԥшь араион Маҷара ақыҭан иргылоу ауадарацәа змоу аҩнеихагыла аҿы ҩ-уаҭахк змоу 15 уадеи уаҭахк змоу 9 уадаки роуит аҿыцнхацәа.
Аҳәынҭқарратә Еилахәыра «Аԥсныргылареи» Аԥсадгьыл ахь ахынҳәразы Аҳәынҭеилаки ирыбжьаз аиқәшаҳаҭра инақәыршәаны, ҳазҭоу ашықәс ԥхынгәымза 16 рзы арепатриациазы аҳәынҭқарратә Еилакы ахархәарахь иаҭан Гәылрыԥшь араион Маҷара ақыҭан ҳџьынџьуаа рзы идыргылаз ауадарацәа змоу аҩнеихагыла.
Аҩны ауааԥсыра рзы акыр иманшәалоу аҭагылазаашьақәа змоу, ишьақәыргылоу атехникатә нормақәа ирықәшәо иҟаҵоуп.
Ашықәс нҵәаанӡа, Маҷара ақыҭан даҽа х-еихагылак змоу хыбрак аргылара ахыркәшара азгәаҭоуп. 2025 шықәсазы х-ҩнык ахархәарахь ирыҭахоит. Зынӡа анхарҭа ҭыԥқәа зауа рсиаҿы иҟоуп зыԥсадгьыл ахь ихынҳәыз 380 ҭаацәара.
