«Иахьа дареи ҳареи аофициалтә ҳәынҭқаррабжьаратә еизыҟазаашьақәа ҳамоуп. Иҳадаҳкылахьоу, аус зуа аиқәшаҳаҭрақәа, аилаӡарақәа, егьырҭ аполитика-зинтә документқәа Аԥсны аполитикатәии аекономикатәии ҿиара иацхраауеит, идырӷәӷәоит ашәарҭадара, ишьақәдыргылоит аҳәынҭқаррақәа рыбжьара акультура-рҵаратәи аинформациатәи ҵакыра», -ҳәа иазгәеиҭеит Одиссеи Бигәаа. .

Аԥсны адәныҟатәи аусқәа рминистр ихаҭыԥуаҩ 16 шықәса рыла аҳәынҭқаррабжьаратәи аԥсны-урыстәылатәи аизыҟазаашьақәа аидыгылара иҿыцу аҩаӡара аҟынӡа инаӡеит ҳәа ҷыдала инаҵшьны иазгәеиҭеит.  

«Абарҭ аамҭақәа рыҩныҵҟа аԥсны-урыстәылатә ҳәынҭқаррабжьаратә еизыҟазаашьақәа аусеицуратә еизыҟазаашьақәа рҟазшьақәа роуит еиуеиԥшым аусхкқәа рҟны: ашәарҭадаратә, асоциал-економикатә, агуманитартә уҳәа убас иҵегьы рҟны. Урыстәыла ҳацхраауеит ҳшәарҭадара аиҿкаараҿы. Ара игылоуп урыстәылатәи абыжьбатәи арратә база. Аԥсны акәзаргьы, ҩыза-тәылак аҳасаб ала Урыстәыла адгылара анаҭоит Арратә операциа ҷыда амҩаԥгараан.», -ҳәа иҳәеит Одисеи Бигәаа.

Уи иажәақәа рыла, иԥшьоу ахақәиҭра рхы ақәырҵеит Аԥсны иреиӷьӡаз аԥацәеи аԥҳацәеи, аҳәаанырцәтәи ҳџьынџьуаа, хатәгәаԥхарала абџьар шьҭыхны иҳацеибашьуаз - Нхыҵ Кавказ, Москва, Санкт-Петербург уҳәа Урыстәыла егьырҭ ақалақьқәеи ааобластқәеи атәылаҿацәқәеи рҟынтәи хатәгәаԥхарала еибашьра иааз.  

«Рфырхаҵарыла дара наунагӡа ахьыԥшымрахь амҩа алырхит. Нанҳәа 26 атәы ҳазхьаԥшуа еиҭаҳәатәуп ари амш ҳажәлари ԥхьаҟатәи ҳабиԥарақәеи рзы алахьынҵа зшьо мшны ишыҟаз.Нанҳәа 26, 2008 шықәса ҳажәлар рҭоурыхтә иашара иашьананы иҟазаауеит ахаангьы», – ҳәа инаҵшьны иазгәеиҭеит Аԥсны адәныҟатәи аусқәа рминистр ихаҭыԥуаҩ.