Аҟәа. Нанҳәамза 24, 2024 шықәса. Аԥсныпресс. 2016 шықәса рзы ииз ахәыҷқәа рыбжьара ашьапылампыл азы Ареспубликатә ахәыҷтәы-қәыԥштә турнир алагеит Аҟәа. Уи ашьапылампыл азы Аԥсны зҽаԥсазтәыз азыҟаҵаҩ, Аԥсны абаҩарҵәыратә культуреи аспорти зҽаԥсазтәыз аусзуҩ Иури Логәуа игәалашәара иазкуп.
Атурнир рхы аладырхәуеит Очамчыра араион Ахәыҷтәы-қәыԥштә спорттә школ акоманда, Гәдоуҭа араион Ахәыҷтәы-қәыԥштә спорттә школ акомандақәа ҩба, ахәмаррақәа рзы Ареспубликатә Ахәыҷтәы-қәыԥштә спорттә школ акоманда, Ашьапылампылтә Клуб «Динамо» Аҟәа, Академиа «Unity» акоманда.
Ашьапылампылтә турнир аиҿкаара рхахьы иргеит - ахәмаррақәа рзы Ареспубликатә Ахәыҷтәы-қәыԥштә спорттә школи Аԥсны ашьапылампыл Афедерациа.
Аиааира згаз аҳамҭақәа ранашьареи атурнир аркра ацеремониеи мҩаԥгахоит нанҳәамза 26 рзы.
Ашьапылампыл азы Аԥсны зҽаԥсазтәыз азыҟаҵаҩ, абаҩарҵәыратә культуреи аспорти рзы Аԥсны зҽаԥсазтәыз аусзуҩ, «Ахьӡ-Аԥша» аорден III аҩаӡара акавалер, 1992-1993 шш. Аԥсны жәлар Рџьынџьтәылатәи еибашьра иалахәыз Иури Логәуа иԥсҭазаара далҵит нанҳәамза 26, 2023 шықәса рзы. Иара ихыҵуан 66 шықәса.
