Аҟәа. Нанҳәамза 15, 2024 шықәса. Аԥсныпресс. Аԥсны афымцамч усхкы аҿы ишьақәгылаз аҭагылазаашьеи ҭагалан-аӡынтәи аамҭахәҭа азы азԥхьагәаҭарақәеи ирызкын аԥыза-министр Алеқсандр Анқәаб имҩаԥигаз аилатәара, ҳәа адырра ҟанаҵоит Аминистрцәа Реилазаара апресс-маҵзура.
Егрытәи Аӡфымцатә станциа адиректор Хада Леван Мебониа астанциа аҿы иҟоу аҭагылазаашьа азы адырра ҟаиҵеит, иара убас афымцамҩангагатә нхамҩа аиҳарак ақәыӷәӷәара аныҟоу аамҭақәа рзы афымцамч азымхара ахарҭәааразы иҟаҵатәу аганахьала игәаанагара иҳәеит. Аилатәара аҿы ирылацәажәеит Егрытәи аӡфымцатә Станциа акомплекс иаанашьҭуа афымцамч ашәагаақәа, аужьҭратә инфраструктура аҭагылазаашьа иадҳәалу азҵаарақәа, иара убас 2024 шықәса аҩбатәи азбжазы афымцамч ахархәара ашәагаақәеи адефицити рзы азԥхьагәаҭарақәа ҟаҵан.
Иалацәажәеит иназыцҵоу афымцамч ахыҵхырҭақәеи афымцамч наҟынтәи аиагаразы афинансыркреи ирыдҳәалоу азҵаарақәагьы ирзааҭгылеит.
Алеқсандр Анқәаб Аенергетикеи атранспорти Рминистрра анапы ианиҵеит АУН «Амшынеиқәафымцамч» алархәны 2024 шықәса аҩбатәи аԥшьбараз Аԥсны рхы иадырхәараны иҟоу афымцалашара амҽхак азгәарҭарц.
Аусбарҭақәа иара убасгьы иаздырхиароуп ажәадгалацҵақәа, фымцамчла аиқәыршәараҿы аиԥҟьарақәа раԥыхразы.
Аусутә еиԥылара иалахәын аԥыза-министр актәи ихаҭыԥуаҩ, Аенергетикеи атранспорти рминистр Џьансыхә Нанба, Аекономикатә политикеи, ареформақәеи рзы Апарламент Аилак ахантәаҩы Резо Занҭариа, «Амшынеиқәафымцамч» Анапхгара ахаҭарнакцәа.
