Уи иажәақәа рыла, «Аԥсны Лаит», анардкыларатә еилазаара аҳасабала аҿаҵаҩы ицны иааиԥмырҟьаӡакәа аусурақәа рынагӡара аганахьала аилацәажәарақәа мҩаԥнагоит. Аҿаҵаҩы урҭ рынагӡара есымша ахылаԥшра анаҭоит.

Мзауҷ Ԥлиа, арлашара аиҭашьақәыргылара иадҳәалоу аусурақәа иазԥхьагәаҭоу аплан инақәыршәаны имҩаԥысуеит ҳәа адырра ҟаиҵеит.   

«Амҩаду арлашагақәа реиҭашьақәыргылара иадҳәалоу аусурақәа рхыркәшара азы иарбоу аҽҳәарақәа иҭкааныҵәҟьаны ишьақәыргылаӡам. Лассы-лассы еиуеиԥшым амҩатә-машәыртә хҭысқәа ҟалоит атрасса аҿы, урҭ ирыхҟьаны абжьааԥны афымцацәаҳәақәа зқу ашьаҟақәа ааха роуеит, икаҳауеит, дара ацәаҳәақәагьы ԥҵәоит, ацәаҳәақәа реиқәылара ҟалоит. Ас еиԥш иҟоу ахҭысқәа ҳара анырра аҳҭаратәы иҟаӡам», –  ҳәа иҳәеит Мзауҷ Ԥлиа. Уи иара убас иажәа иацҵо, «Аԥсны Лаит» арлашараҿы аиԥҟьарақәа рзы ироуа адыррақәа оперативла ирызхьаԥшуеит, аиҭашьақәыргыларатә усурақәа мҩаԥнагоит ҳәа адырра ҟаиҵеит.

«Аха, ишдыру еиԥш, аиԥҟьарақәа рырҽеира аамҭа аҭаххоит. Уи аҭыԥқәа рҿы иҟоу аҭагылазаашьа зеиԥшроу иадҳәалахоит», - ҳәа иҳәеит Мзауҷ Ԥлиа.

Иара убасҵәҟьа, напхгара зиҭо аилазаара иааиԥмырҟьаӡакәа ахылаԥшра зҭаху ареспубликатә мҩаду зымҽхак ҭбаау ахәҭа, ахәҭакахьала Ԥсоуи Аҟәеи еимаздо амҩаду амаҵзура нанагӡоит ҳәа иазгәеиҭеит.