Аҟәа. Цәыббрамза 14, 2022 шықәса. Аԥсныпресс. Аԥсны Ауаажәларратә Палата аҿы имҩаԥысуеит Аҳәынҭқарра Ахада Аслан Бжьаниеи аоппозициа ахаҭарнакцәеи реиԥылара.
Аиԥылара цәыббрамза 6, 2022 шықәса рзы ареспубликатә уаажәларратә еиҿкаара «Аԥсны жәлар реиҿкаара» анапхгаҩы Адгәыр Арӡынба, ареспубликатә уаажәларратә еиҿкаара «Аруаа» анапхгаҩы Ҭемыр Гәлиа, ареспубликатә политикатә партиа «Аԥсны жәлар ракзаара Афорум» ахантәаҩы Аслан Барцыц, аполитикатә партиа «Аԥсны» ахантәаҩы Витали Габниа, Ауаажәларратә Палата абазаҿы Аконсультативтә Хеилак аԥҵаразы Аиқәшаҳаҭра апроект алацәажәара инамаданы аиԥылара аиҿкааразы инашьҭыз ааԥхьара инақәыршәаны, Ауаажәларратә Палата абжьгареи абжьацәажәареи рыла еиҿкаахеит.
Аиԥылара рхы аладырхәуеит Аԥсны Аҳәынҭқарра Ахада Ихаҭыԥуаҩ Бадра Гәынба, Аҳәынҭқарра Ахада Иусбарҭа анапхгаҩы Џьансыхә Нанба, ашәарҭадара Ахеилак Амаӡаныҟәгаҩ Сергеи Шамба, Аҳәынҭқарра Ахада Иусбарҭа анапхгаҩы ихаҭыԥуаҩ Зураб Қаџьаа, адәныҟатәи аусқәа рминистр Инал Арӡынба, «Аԥсны Жәлар Реиҿкаара» анаԥхгаҩы Адгәыр Арӡынба, Ареспубликатә уаажәларратә Еиҿкаара «Аруаа» анапхгаҩы Ҭемыр Гәлиа, Ареспубликатә политикатә Партиа «Аԥсны Жәлар ракзаара Афорум» ахантәаҩы Аслан Барцыц, аполитикатә Партиа «Аԥсны» ахантәаҩы Витали Габниа.
Ауаажәларратә еиқәшаҳаҭра ашьақәгылара хықәкыс иҟаҵаны атәыла Анапхгареи аоппозициеи рхаҭарнакцәа рыбжьара адиалог амҩаԥгара аиҿкаара азы Ауаажәларратә Палата аусуратә гәыԥ ахаҭарнакра руеит Сократ Џьынџьал, Витали Смыр, Михаил Сангәлиа, Руслан Ҳашыг, Абесалом Кәарҷиа.
Аиԥылара аартуа, аԥснытәи аҳәынҭқарратә усзуҩ Сократ Џьынџьал иҳәеит: «Ҳара иаҳҭахуп атәыла Анапхгара ажәлар ргәаанагара ахь азҿлымҳара аадырԥшларц!»
Аҳәынҭқарра Ахада Аслан Бжьаниа инаҵшьны иазгәеиҭеит: «Сара агәӷра сымоуп иахьатәи ҳаицәажәара иҵакыдахарым ҳәа, ҳзеизаз аус ишадҳәалахо, насгьы фактла ишышьақәырӷәӷәахо. Ихадоу азҵаара алаҳкаап, иара убри аганахьала аусурагьы ҳалагап», - ҳәа иҳәеит иара. сказал он.
