Аҟәа. Нанҳәамза 6, 2024 шықәса. Аԥсныпресс. Аԥсны Автоҳәынҭинспекциа анапхгара амаршрут таксиқәа рныҟәцаҩцәа Автоҳәынҭаинспекциа амаршрут таксиқәа рныҟәцаҩцәа ирацәажәеит амҩатә ԥҟарақәа рықәныҟәара шхымԥадатәиу азы ҳәа адырра ҟанаҵоит Аԥсны аҩныҵҟатәи аусқәа Рминистрра апресс-маҵзура.
Автоҳәынҭинспекциа аиҳабы аамҭала инапынҵақәа назыгӡо Дамеи Аҩӡба ишазгәеиҭаз ала, Автоҳәынҭинспекциа аусзуҩцәа ас еиԥш апрофилактикатә ҟазшьа змоу аусмҩаԥгатәқәа иааиԥмырҟьаӡакәа инарыгӡалоит.
Еиҳа лассы-лассы ауааԥсыра иаргәамҵуеит аҳәааҟынӡа инагоу амаршрут ала аус зуа амашьынарнҟәцаҩцәа рхымҩаԥгашьа. Убарҭ роуп аԥхьанатә зацәажәара мҩаԥгаз. Иара убас Автоҳәынҭинспекциа анапхгаҩцәа Аҟәа ақалақь аҩныҵҟа, ахәҭакахьала, Аџьармыкьа–Кьалашәыр, Аџьармыкьа – Аҳабла Ҿыц амаршрутқәа рыла апассаџьырцәа риагара мҩаԥызго амашьынарныҟәцаҩцәагьы ирацәажәеит.
Амҩаҿы аныҟәара ашәарҭадара аҳәынҭқарратә хылаԥшыҩ хада изыӡырҩуаз зегьы ирызнеигеит аҵыхәтәантәи аамҭа аҩныҵҟа иҟалаз авариақәа, иҭахази еиуеиԥшым ахәрақәа заузи рхыԥхьаӡара, амашьынарныҟәцаҩцәеи ашьаҟауааи еиҳа лассы-лассы еиларго амҩатә ԥҟарақәа, уҳәа рзы адыррақәа.
Аԥсны Автоҳәынҭавтоинспекциа аиҳабы и.н. Дамеи Аҩӡба иҳәеит аԥҟара аилагаҩцәа рмашьынақәа рымхны аргыларҭа ҭыԥқәа рахь инаргар шауа, дара рхаҭақәа амашьынарныҟәаразы аԥышәарақәа шыддырҭиуа. Аԥсны Автоҳәынҭавтоинспекциа аусзуҩцәа амаршрут таксиқәа рныҟәцаҩцәа агәҽанызаара рырҭеит амҩатә ԥҟарақәа еилазгаз рмашьынақәа рымхны ахараԥсатә ргыларҭахь ишнарго азы.
«190 машьына иахьатәи аамҭазы ахараԥсатә ргыларҭаҿы игылоуп. Аԥсҟы зкыз арыжәтә ыжәны ма анаркотикқәа рыдкыланы иҟан. Агәҽанызаара шәысҭоит шәмашьынақәагьы уахь ишнагахо мамзаргьы аграждантә цәамаҭәа зшәу амилициа аусзуҩцәа шәмашьынақәа ишрықәҳартәало аилагарақәа азгәарҭаларц", - ҳәа иҳәеит Аԥсны Аҳәынҭавтоинспекциа аиҳабы и.н. Дамеи Аҩӡба.
Дамеи Аҩӡба иажәақәа рыла, иҳаҩсыз амзазы амҩан иҟалаз амашәырқәа ирыхҟьаны иҭахеит жәаҩык ауаа. Ас еиԥш 30 шықәса рыҩнуҵаҟа иҟамлацызт.
«Аҵыхәтәантәи 30 шықәса рыҩнуҵҟа Аԥсны амҩақәа рҿы иҭахахьеит 1700-ҩык. Аибашьраан иҭахеит 1800-ҩык ҳаибашьцәа, аха урҭ зҭахоз рдыруан. Ҳара иахьа ҳазҭахо ҳәа иҟоузеи?», - ҳәа иҳәеит Дамеи Аҩӡба.
Ахәыҷқәа амҩа-транспорттә машәыртә хҭсқәа раан ахәрақәа роура армаҷра азы апрофилактика амҩаԥгара хықәкыс иҟаҵаны ахәыҷқәа рыиагараан иҟоу аҷыдарақәа ҳасаб рзуреи ауаажәларратә транспорт ала ахәыҷқәа рыиагара ашәарҭадареи ҷыдала ахшыҩзышьҭра аҭан.
Амашьынарныҟәцаҩцәа аӡәырҩы Автоинспекциа анапхгара ахшыҩзышьҭра аҭаны ирзыӡырҩит. Урҭ Автоҳәынҭинспекциа анапхгара аусура иарҭо ахшыҩзышьҭра азы иҭабуп ҳәа рарҳәеит, аринахысгьы излауа ала агәҽанызаара шаадырԥшлогьы рҳәеит.
Аԥсны Аҩнуҵҟатәи аусқәа рминистрра апресс-маҵзура адыррала Аҳәынҭавтоинспекциа аамҭа-аамҭала аилыркааратә еиҿцәажәарақәа мҩаԥыргалоит.
