Аҟәа. Ԥхынгәымза 22, 2024 шықәса. Аԥсныпресс. Аҳазалхратә Ҭыԥ «Ԥсоу» аҿы уи аоперативтә усзуҩцәеи Гагра аихамҩатә вокзал амилициа аусзуҩцәеи автомашьына «ВАЗ 2114» ааныркылеит. Уи аԥсҟы икын Аԥсны атәылауаҩ Мумџьиан В.А., уи амашьына дицҭатәан –Ареспублика Аԥсны атәылауаҩ Каленџьиан Г.В. Автомашьына Урыстәылатәи Афедерациа аҟынтәи Аԥсныҟа ихан. Хаҭала агәаҭараан Мумџьиан В.А. идырбалеит ҵәаҟьак ахәшә «Лирика 300 мг» зҭаз, Каленџьиан – аполитиетилентә еилаҳәара иагәылаз аххыраԥшра змоу ишкәакәоу амаҭәашьар, ҳәа адырра ҟанаҵоит Аԥсны Аҳәынҭқарратә ҳазалхратә Еилакы.
Аԥсны аҩныҵҟатәи аусқәа Рминистрра аҿы имҩаԥыргаз аекспертиза алкаақәа рыла ишеилкаахаз ала, иаанкылаз ауаа ирымхыз амаҭәашьар зыкапан 4,2 грамм рҟынӡа инаӡо арҩышьыгатә маҭәашьар «прегабалини» зыкапан 2,77 грамм рҟынӡа инаӡо анаркотикатә хархәага «метадони» роуп. Иарбоу афакт ала аматериалқәа зегьы аусеиҿкааратә ӡбамҭа адкыларазы Аԥсны аҩныҵҟатәи аусқәа Рминистрра заанаҵтәи аусеилыргара аусбарҭақәа рахь идәықәҵоуп.
