Аҟәа. Рашәарамза 12, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа ирылахәу аԥснытәи аспортсментцәа дрықәныҳәеит.
«Акыр иаԥсоу Аԥсны амилаҭтә еизгоу акоманда аспортсменцәа! Иахьа, шәара раԥхьаӡа акәны Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) имҩаԥнаго Ахәмаррақәа жәларбжьаратәи аренаҟны шәықәгылоит, Аԥсны жәлар зегьы гәадурала ишәыхәаԥшуеит, ргәыӷрақәа шәыдырҳәалоит. Аҟәа Ахақәиҭра ашҭаҟнытә Казанҟа шәцара – аспорттә маршрут ахацыркра мацара акәӡам изызҳәоу, ари адунеи зегьы ҳкультуреи аспорт аҟны иҳамоу абаҩхатәреи раарԥшразы ҳтәыла аҭоурых аҟны алшара анцәырҵыз иамшуп.
Еицырдыруа аԥсуа шьапылампыласҩы Ахрик Цәеиба иааиртуа Атәылақәа рпарад Аԥсны 13 спорт хкы рыҟны ақәгылара алзыршо амилаҭтә еизгоу акоманда акзаара иасимволны иҟалоит.
Аԥсны ахьынӡанаӡааӡо ақәгыларақәа, аицлабрақәа зегьы ргәы хыҭхыҭуа ирыхәаԥшлоит. Шәара жәларбжьаратәи аренаҟны шәықәгылоит шәыԥсадгьыл ахьӡала, ара лҵшәақәас иҟалалакгьы, ари иааироуп. Еицлабрацыԥхьаӡа, есқьынгьы ишәхашәмыршҭлан, шәара шәоуп ҳтәыла абри аҩаӡараҟны хаҭарнакра азуразы ақәгылара злахьынҵахаз.
Ишәзеиӷьасшьоит аихьӡарақәа, агәамч, ахачҳара, ахагәрагара. Ижәдыруаз, шәара ижәго аиааира – хьӡи-ԥшеи шаанаго шәара шәзеиԥш, Аԥсны зегьы азгьы!», - ҳәа иазгәеиҭеит Аҳәынҭқарра Ахада.
