Аҟәа. Цәыббрамза 9, 2022 шықәса. Аԥсныпресс. Цәыббрамза 25 рзы Аҟәа ақалақь аҿы раԥхьаӡатәи аԥсуа романист Иван Гьаргь-иԥа Папасқьыр диижьҭеи 120-шықәса аҵра инамаданы имҩаԥысуеит IX Жәларбжьаратәи аҿартә арт-фестиваль «Аԥшаҳәаҿы анеиааира».
«Афестиваль ахықәкы хада – еиҳарак аҿар рыбжьара аԥхьара, ашәҟәқәа, алитературатә ҟазара апропагандеи апопулиаризациеи ауп; аинтеллектуалтә ҿиара азы зегьы реиҳа иманшәалоу, иазку аҭыԥ аҳасабала абиблиотекақәа рпопулиаризациа», - ҳәа Аԥсныпресс акорреспондент диҿцәажәо иҳәеит И. Гь. Папасқьыр ихьӡ зху Амилаҭтә библиотека анапхгаҩы Борис Ҷолариа.
Уи иажәақәа рыла, иарбоу ахықәкы анагӡаразы, Аԥсны ауааԥсыреи уи иаҭаауа асасцәеи афестиваль алахәхаразы радыԥхьалара азы еиуеиԥшым аформақәеи аметодқәеи рхархәара алыршоуп, акульура, аҟазара, ажәлар рҟазара еиуеиԥшым ажанрқәа зныԥшуа афестиваль атерриториақәа еиҿкаахоит.
Афестиваль апринцип хадақәа иреуоуп – аҳәаақәа раартра, алахәылацәа реиԥш ахәаԥшцәагьы рзы афестиваль ахь анаӡара армариара.
Афестиваль рхы аладырхәыр алшоит уи азы агәаҳәара змоу, аоргкомитет ахь азыҳәамҭа алазҵаз зегьы.
Афестиваль аԥҵаҩцәас иҟоуп – акультура Аминистрреи И.Гь. Папасқьыр ихьӡ хәу Аԥсны Амилаҭтә библиотека.
Афестиваль апартниорцәа раҳасабала иқәгылоит Аԥсни Урыстәылеи акультура аусбарҭақәа, иара убас ареспублика араионқәеи ақалақьқәеи Рхадарақәа.
Афестиваль аусмҩаԥгатә хадақәа Амилаҭтә библиотека ахыбра иахьаҵанакуа имҩаԥыслоит.
