Аҟәа. Рашәарамза 6, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа 2024 шықәса рашәарамза 5-8 рзы Санкт-Петербург АЦӘЦ «Експофорум» аҟны имҩаԥысуа XXVII Петербургтәи жәларбжьаратәи аекономикатә форум (ПЖӘАФ) далахәуп. Абри атәы аанацҳауеит Аҳәынҭқарра Ахада ипресс-маҵзура.
Иахьа, рашәарамза 6 рзы, афорум аҳәаақәа ирҭагӡаны Аслан Бжьаниеи УА Аиҳабыра Ахантәаҩы Ихаҭыԥуаҩ Александр Новаки, Санкт-Петербург агубернатор Александр Беглови, Ленинградтәи аобласт агубернатор Александр Дрозденкои, Башкорҭосҭан Ареспублика Ахада Ради Хабирови, Адыгеиа Ареспублика Ахада Мураҭ Кумпилови, иара убас Аҩада Кавказтәи аокруг ареспубликақәа рхадацәеи еиԥылеит.
Аиԥылараҟны ирылацәажәеит ҩ-ганктәи аекономикатә усеицура иадҳәалоу азҵаара хадақәа, аинвестициақәа, аинфраструктуратә проектқәа, атуризм, аҭҵаарадыррақәа аусхкқәа рыҟны ахәаахәҭра-економикатә еимадарақәа рырҿиара азҵаара убрахь иналаҵаны.
Аиԥыларақәа ҩ-ганктәи аекономикатә усеицура арӷәӷәара ирызкын.
Уаҵәы, рашәарамза 7 рзы Аԥсны Аҳәынҭқарра Ахада Аслан Бжьаниеи Аԥснытәи аделегациеи Урыстәылатәи Афедерациа Ахада Владимир Путин дықәгылараны дахьыҟоу Петербургтәи жәларбжьаратәи аекономикатә форум иалахәхоит.
