Дарбанызаалак ахәыҷы насыԥла иҭәу ишәарҭадоу ахәыҷреи ибзиоу аҵарадырреи амедицинатә цхыраареи ганрацәала аҿиареи имазар ахәҭоуп.  Убри аҟнытә ари аныҳәатә мшы азы аиҳабацәа зегьы рахь ааԥхьара ҟасҵоит Аԥсны ахәыҷқәа реизҳазыӷьара азы ирылшо зегьы ҟарҵарц. Шәааи, ҳхәыҷқәа ргәы бзианы иахьрызҳаша, иахьыҿиаша, анаҩс Ҳаԥсадгьыл азы ихәарҭаны иҟалартә еиԥш хра злоу адыррақәа ахьроуша аҭагылазаашьақәа аԥаҳҵап», – ҳәа иаҳәоит адныҳәалара аҿы.

Мактина Џьынџьалԥҳа ахәыҷқәа рыхьчара аҿы злагала алоу зегьы: аҭаацәа, арҵаҩцәа, азинхьчаҩцәа, аҳақьымцәа, ахәыҷқәа рыпроблемақәа рыӡбара зхы алазырхәуа зегьы иҭабуп ҳәа ралҳәеит.

Ахәыҷы изинқәа рыхьчаразы азинмчы змоу ахәыҷқәа зегьы агәабзиара, анасыԥ, аҵараҿы аихьӡарақәа, рыгәҭакқәеи ргәазыҳәарақәеи рынагӡара рзеиӷьалшьеит.

«Шгәазыҳәарақәа зегьы нагӡахааит, шәыԥсҭазаара хра злоу ахҭысқәа, аемоциақәа, ишәзааигәоу ауаа ргәыбылреи  рыԥхарреи рыбзиабареи  рыла игәылҭәахааит! Шәадныҳәалаз Жәларбжьаратәи ахәыҷы ихьчара Амш!», - ҳәа иазгәаҭоуп адныҳәалара аҿы.