«Иара ихәмарра сара раԥхьаӡа акәны избеит зынӡа саныӡӷабыз. Усҟан иара дызлаз атеатралтә гәыԥ агастрольқәа рыманы Аԥсны ақыҭақәа ирҭаауан, сара усҟан Гәдоуҭа араион Дәрыԥшь ақыҭан сынхон. Актиорцәа ҳзааит ҳәа ансаҳа, сҩызцәеи сареи аспектакль ахь ҳцеит», - ҳәа илгәалалыршәоит лара.
Аԥсны Жәлар рартист Шьалуа Гыцба, аспектакль «Отелло» ахәаԥшразы Асовет Еидгыла егьырҭ ареспубликақәа рҟынтәи иаауан ҳәа иазгәеиҭеит, уи атәы рыҩуан Асовет Еидгыла еицырдыруаз атеатралтә критикцәа, Шәарах Ԥачалиа ихәмарра ахәшьара ҳаракы арҭон. Иааизакны, Ԥачалиа асценаҿы 150 инареиҳаны арольқәа наигӡеит. Асценаҿы ақәгылара адагьы, уи 1939 шықәса инаркны аспектакльқәа ықәиргылон, убасгьы атеатр азы иҩхьан апиесақәа, иаҳҳәап: «Ачара ду», «Гәында».
1960-тәи ашықәсқәа ралагамҭазы шықәсқәак аус иуан Ижевск, уа Удмуртиатәи адраматә театр арежиссиорс дыҟан, иара убас, напхгара аиҭон Ҭҟәарчалтәи ашахтиорцәа ртеатр.
Гьаргь Гәлиа ицхыраарала, усҟан Аԥсны аҟазара аусқәа рзы ахеилак аиҳабыс аус зуаз, Шәарах Ԥачалиа Москва И. М. Раевски иҟны Атеатралтә ҟазара Аҳәынҭқарратә Институт (ГИТИС) арежиссиор икурсқәа дрылгоит.
Шәарах Ԥачалиа Аԥсуа ҳәынҭқарратә филармониа асахьаркыратә напхгаҩыс дыҟан. 1970-тәи ашықәсазы афилармониа аҟны иаԥҵаз аминиатиурақәа ртеатр «Чарирама» ашьаҭаркыҩцәа дыруаӡәкхеит, иара убасгьы, атеатр актиорс дыҟан, амоноспектакльқәа иманы дықәгылон. Аминиатиуратә театр арепертуар аҟны иҟан Д. Гәлиа, Б. Шьынқәба, И. Папасқьыр, М. Лакрба, Гь. Гәлиа, Шь. Ҷкадуа, А. Аргәын. П. Бебиа, Џь. Аҳәба, Н. Ҳашыг, А. Возба уҳәа аӡәырҩы рҩымҭақәа.
Шәарах Ԥачалиа иоуп иаԥызҵаз Тҟәарчалтәи аҳәынҭқарратә акомедиатә театр, насгьы ашьаҭаркҩыси анапхгаҩыси иҟаз.
Шәарах Ԥачалиа «Ачара ду» (1942), «Гәында» (1957), «ԥсра зқәым», «Мазлоу зегьы злоу», «Иҭахаз ақыҭа», «Салуман» уҳәа авторс дрымоуп. Акомедиа «Гәында» ықәыргылан Ужгород Закарпаттәи Украина амузыка-драматә театр асцена аҟны. Шәарах Ԥачалиа ҩ-шәҟәык – «Сара сзанааҭи» «Актиор имҩеи» авторс дрымоуп.
1940 шықәсазы Шәарах Ԥачалиа Аԥснытәи АССР Жәлар рартист ҳәа ахьӡ. 15 шықәса рышьҭахь, 1955 шықәсазы - Қырҭтәылатәи ССР Жәлар рартист ҳәа. 1966 шықәсазы Ԥачалиа дхынҳәуеит С. Ҷанба ихьӡ зху Аԥсуа драматә театр ахь, 1976 шықәса инаркны 1988 шықәсанӡа уи атеатр хадара азиуан.
Шәарах Абзагә-иԥа Ԥачалиа иԥсҭазаара далҵит 2000 шықәсазы. Анышә дамадоуп Аԥсны ауаажәларратә усзуҩцәеи ашәҟәыҩҩцәеи Аҟәатәи рпантеон аҟны.
Шәарах Ԥачалиа иааигәаны дыздыруаз зегьы рзы илеишәа шыцәгьаз, ихахьы иигоз аҭакԥхықәрагьы шырацәаз, аламыс змаз, зуси зажәеи еимадаз, аҟыбаҩ ду злаз, зтеатр бзиа избоз уаҩны дшыҟаз атәы азгәарҭоит.
Иџьбараз, абаҩхатәра дуи, аламыси, ауаҩреи злаз Шәарах Ԥачалиа ухаҿы дааугарц азы иуҳәаша аепитетқәа рацәаӡоуп. Арҭ зеиӷьаҟам аҟазшьақәа рыла ихарҭәаахоит ахӡырымгареи абаҩхатәреи дырҿырԥшыган иҟаз иналукааша ауаҩы – Шәарах Ԥачалиа ихаҿсахьа.
Иара еиҵагыло абиԥарақәа рзы иҭынхеит хәызмаӡам зхатә ҟазшьа змоу, акы иуцәаламҩашьо аԥсуа театри акиноуи рдунеи.
