Аҟәа. Лаҵарамза 14, 2024 шықәса. Аԥсныпресс. Лаҵарамза 15 – 16 рзы Р.Гәымба ихьӡ зху Аԥснытәи аҳәынҭқарратә филармониа аҿы имҩаԥысуеит XXVI ахәыҷтәы-қәыԥштә хореографиатә коллективқәа рконкурс «Аӡыхь – 2024» .(«Родничок»).
Аконкурс мҩаԥысуеит амилаҭтә хореографиа иреиӷьу атрадициақәа реиҭашьақәыргылареи анаҩстәи рыҿиареи еиҵагыло аҿар амилаҭтә фольклори жәлар рҟазареи рахь абзиабара рылааӡареи хықәкыс иҟаҵаны. Аконкурс еиҿнакаауеит Аԥсны акультура Аминистрра аҟны иҟоу И. Е. Кортуа ихьӡ зху жәлар рҟазара Ареспубликатә Центр.
Аконкурс актәи амш, лаҵарамза 15 рзы рҟазара аадырԥшуеит 12 шықәса зхыҵуа аиҵбыратә гәыԥ иаҵанакуа ахәыҷқәа; аҩбатәи амш, лаҵарамза 16 рзы, аиҳабыратә гәыԥ алахәылацәа.
Аконкурс мҩаԥысуеит хә-номинациак рыла: аԥсуа жәлар рыкәашара; адунеи ажәларқәа рыкәашара; ҳаамҭазтәи акәашара (аспорттә, аестрадатә, адәахьтәи, уҳәа убас иҵегьы); ҩыџьа-ҩыџьа рыкәашара (акәашаратә дует); ахкытә кәашара.
Аконкурс аҿы, аҭыԥантәи аколлективқәа рыдагьы, ахы аланархәуеит Шәача ақалақь Лазаревсктәи араион аҟынтәи адыга жәлар рыкәашаратә ансамбль «Шаԥсыӷтәыла» («Шапсугиа»). Ансамбль асахьаркыратә напхгаҩы Биба Тарчокова.
Аконкурстә мшқәа алагоит – асааҭ 18:00 рзы.
