Амаланыҟәатә еилазаара аҟынтәи арԥарцәа инеиԥынкыланы, есышықәса Аԥсны Аҳәынҭқарратә бираҟ Амш аҽны – ԥхынгәымза 23 рзы, иара убас Аԥсны жәлар Рџьынџьтәылатәи еибашьра аҿы Аиааиреи Ахьыԥшымреи Рымшныҳәа аҽны – цәыббрамза 30   рзы амаланыҟәатә еиԥхныҩларақәа мҩаԥыргоит.

Амаршрут анаӡара –  35 км. ыҟоуп. Ари аусмҩаԥгатә рхы аладырхәуеит қәрала еиуеиԥшым  ауаа. «Араҟа аамҭак ала ахәыҷқәа реиԥш аиҳабацәеи ахьалаху инамаданы, атемп аҽарнааларала аҭахуп, убас бжьаратәла аццакра  сааҭк ахь 15 км. еиҳахаӡом», –  ҳәа иҳәеит Евгени Павлов.

Сынтәа ари 11-тәи амаланыҟәатә еиԥхныҩлара ауп.  

Амаланыҟәатә еиԥхныҩларақәа ирылаху амҩан ирыцуп Аҳәынҭқарратә автоинспекциа аусзуҩцәа.  

«Амаршрут аҿы иҳамҩатәны Аџьынџьтәылатәи еибашьра Дуӡӡеи Аԥсны жәлар Рџьынџьтәылатәи еибашьреи рҿы иҭахаз аибашьцәа рбаҟақәа рымҵан ашәҭ шьыҵәрақәа шьҭаҳҵоит.   Иҟалаӡом еибашьрак аветеранцәа ргәалашәара, егьырҭ аветеранцәа рбаҟақәа ураҩсны ацара», - ҳәа иазгәеиҭеит Евгени Павлов.

Амаланыҟәатә еиԥхныҩлара иалахәыз руаӡәы, акультуратә фонд «Справедливость. Благополучие. Развитие» апресс-маҵзура анапхгаҩы Алиона Заикина Аԥсныпресс акорреспондент диҿцәажәо илҳәеит: «Сара даараӡа исҭахын ари амаланыҟәатә еиԥхныҩлара аҽалархәра. Ари акциа ала ҳара аҭынчреи ахақәиҭреи ҳзаазгаз ҳветеранцәа ҳаҭырла иаҳгәалаҳаршәоит».

Алиона Заикина ас еиԥш иҟоу акциақәа аринахысгьы аҽалархәра лгәы иҭоуп.

В.Г.Арӡынба ихьӡ зху Аҳәынҭқарратә Арратә Ахьӡ-Аԥша амузеи адиректор Мзиа Беииа амаланыҟәатә еиԥхныҩлара алагаанӡа уи алахәылацәа зегьы Аиааира Амшныҳәа рыдылныҳәалеит рымҩагьы дақәныҳәеит.

Амаланыҟәатә еиԥхныҩлара мҩаԥысуан амаршрут  «Аҟәа ақалақь –Маҷара ақыҭа – Аҟәа ақалақь» ала. Акциа хыркәшахеит Аҟәа ақалақь, Диаскураа Рыԥшаҳәа аҿы игылоу Идырым асолдаҭ ибаҟа амҵан ашәҭ шьыҵәрақәа рышьҭаҵарала.