Аҟәа. Мшаԥымза 25, 2024 шықәса. Аԥсныпресс. Апарламент адепутатцәа аҩбатәи ахыркәшаратә аԥхьараҿы «Аҳәынҭқарратә баџь азы» азакәан аиҭакрақәа ралагалара азы аӡбамҭа рыдыркылеит. Иарбоу азакәан апроект азы рыбжьы рҭиит 29-ҩык адепутатцәа.
Аусшәҟәы адгалара мҩаԥигеит абиуџьети акредиттә еиҿкаарақәеи ашәахтәқәеи афинансқәеи рзы апарламенттә Еилакы ахантәаҩы Беслан Ҳалуашь.
Азакәан апроект ахәдықәҵаразы аиқәшаҳаҭрақәа рышьақәырӷәӷәара азы аҳәынҭқарратә нотариалтә конторақәа рнотариусқәа инарыгӡо ауснагӡатәқәа рзы аҳәынҭқарратә баџь алхра иадҳәалоу азакәанхархәаратә ԥышәа аиӷьтәра хықәкыс иаманы еиқәыршәоуп. Иарбоу азакәан апроект ала иалххо аҳәынҭқарратә баџь анаӡаратә ҩаӡара шьақәыргылахоит.
Ахәдықәҵаразы аиқәшаҳаҭрақәа рышьақәырӷәӷәара азы аҳәынҭқарратә баџь ахышәа-ҵышәа абасала ишьақәгылоит:
- хазхаҭалатәи ахаҿқәа рзы – ирыдыркыло аҭакԥхықәра аицҵалыҵ аҟынтәи 1 % рҟынӡа инаӡоит, аха убри аан уи еиҵаӡоу аулафахәы аҩаӡара аҟынтәи 50 % еиҵамзароуп, 3 000 мааҭ иреиҳамзароуп;
- хазхаҭалатәи аусдкылаҩцәа рзы – ирыдыркыло аҭакԥхықәра аицҵалыҵ аҟынтәи 1 % рҟынӡа инаӡоит, аха убри аан уи еиҵаӡоу аулафахәы аҩаӡара аҟынтәи 50 % еиҵамзароуп, 5 000 мааҭ иреиҳамзароуп;
- аиҿкаарақәа рзы - ирыдыркыло аҭакԥхықәра аицҵалыҵ аҟынтәи 1 % рҟынӡа инаӡоит, аха убри аан уи еиҵаӡоу аулафахәы аҩаӡара аҟынтәи 50 % еиҵамзароуп, 7 000 мааҭ иреиҳамзароуп.
