Аҟәа. Мшаԥымза 24, 2024 шықәса. Аԥсныпресс. Аԥсны асоциалтә хьчареи адемографиатә политикеи рминистр Руслан Аџьба Калужтәи аобласт асоциалтә хьчареи аџьеи рминистр Павел Коновалов диԥылеит.
Аиԥылара иара убас рхы аладырхәит атуризм аминистр Ҭеимураз Хишба, ацентр «Развитие» азеиԥш зҵаарақәа рзы адиректор Елена Заицева, Урыстәыла Анапхгара аҟны иҟоу Калужтәи аобласт Анапхгара ахаҭарнакра аинвестициатә проектқәа заанаҵтәи аиқәыршаҳаҭра аҟәша аспециалист хада Ксениа Макарова, Аԥсны асоциалтә хьчареи адемографиатә политикеи Рминистрра азинтә ҟәша аиҳабы Ромео Черқьезиа.
Руслан Аџьба раԥхьаӡа акәны Аԥсны иаҭааз асасцәа бзиала шәаабеит ҳәа реиҳәеит.
«Ҳара ҳаицәажәоит, ҳгәаанагарақәа еибаҳҳәараны ҳаҟоуп, ҳара ҳаспициалистцәеи шәара шәыспециалистцәеи еибадырып, анаҩстәи русеицура азы аконтактқәа еимырдап. Агәра ганы сыҟоуп ҳаԥхьаҟа Аԥсни Калужтәи аобласти рыбжьара аиҩызареи аусеицуреи рыбжьаҵара азы амеморандум анапаҵыҩра шалыршахо», - ҳәа иҳәеит Руслан Аџьба.
Павел Коновалов адкылара бзиа азы иҭабуп ҳәа иҳәеит.
Руслан Аџьбеи Павел Коновалови аҩ-минстррак анаҩстәи русеицура аперспективақәа ирылацәажәеит, аиԥылара ахыркәшамҭаз аганқәа агәаларшәагатә ҳамҭақәа еимырдеит.
