Абеиџь ада аус зуа аекскурсиамҩаԥгаҩцәа рзы ашәҟәынҵақәа еиқәыршәан. 2017 шықәсазы ирыдыркылаз азакәан инақәыршәаны, аҳәаанырцәтәи атәылауаа уи азы ишьақәырӷәӷәоу ақәыршаҳаҭратә усшәҟәқәа рыда, иара убас иахәҭоу аҵарадырра ада Аԥсны иахьаҵанакуа аекскурсиатә усура амҩаԥгара азин рымаӡам. Аха ус ишыҟоугьы, есышықәса атуризм Аминистрра изакәанымкәа Аԥсны аус зуа аекскурсиамҩаԥгаҩцәа раарԥшра мҩаԥнагоит. Убас, иҳаҩсыз ашықәс азы иаарԥшын 40-ҩык инареиҳаны изакәанымкәа аус зуаз аекскурсиамҩаԥгаҩцәа. Ҳазҭоу ашықәс алагара инаркны – 17-ҩык.
Агәаҭарақәа иара убас имҩаԥган Афонҿыцтәи аӡхыҽҽа аҿгьы. Араҟагьы иара убас иаарԥшын аиԥш-зеиԥшу аилагарақәа. Иааизакны уахәаԥшуазар, Афон Ҿыц ақалақь аҿы имҩаԥгаз агәаҭарақәа раан аекскурсиатә фирмақәа рганахьала аекскурсиатә усура аԥҟарақәа реилагара азы еиқәыршәан актқәа ԥшьба.
Уажәазы Аԥсны иахьаҵанакуа 600-ҩык инарзынаԥшуа аттестациа иахысхьеит, урҭ аекскурсиатә усура амҩаԥгаразы азин рымоуп.
