Аҟәа. Хәажәкырамза 23, 2024 шықәса. Аԥсныпресс. Иахьа Аԥсны Жәлар Реизара-Апарламент Аиҳабы Лаша Ашәбеи Урыстәылатәи Афедерациа Афедералтә Еизара Ахеилак ахантәаҩы ихаҭыԥуаҩ Константин Косачиови ҭелла реицәажәара мҩаԥысит.
Жәлар Реизара-Апарламент Аиҳабы иколлегацәа адепутатцәа зегьы рыхьӡала хаҭала иара ихьӡала Москва амҵан, аконцертә зал «Крокус Сити Холл» аҿы иҟалаз атеракт инамаданы дидышшылеит.
«Ҳара иҟалаз даараӡа ҳгәы ҳнархьит. Атеррористцәа рымшала ааха зауз, иҭахаз зегьы рыуацәеи рҭынхацәеи гәыкала ҳрыдышшылоит», – ҳәа иҳәеит иара.
Апарламент Аиҳабы Аԥсны Урыстәыла анеонацизми атерроризми рҿагылара аҿы иадгылоит ҳәа инаҵшьны иазгәеиҭеит.
Константин Косачиов Лаша Ашәба иҟаиҵаз адышшылареи иааирԥшыз агәцаракреи рзы иҭабуп ҳәа еиҳәеит.
