Аҟәа. Хәажәкырамза 23, 2024 шықәса. Аԥсныпресс. Урыстәылатәи Афедерациа аҟны иҟоу Аҷыдалкаатә зинмчы змоу Аԥсны ацҳаражәҳәаҩ Алхас Кәыҵниа хәажәкырамза 22 ахәылбыҽха «Крокус Сити Холл» иҟалаз атеракт дахцәажәеит.
«Ҳара ӷәӷәала ҳақәыӡбоит Москва амҵан иҟалаз, хыԥхьаӡара рацәала ауаа рыԥсҭазаара ҿахызҵәаз, шәҩыла ааха рызҭаз ари агәымбылџьбаратә атеррорист акт.
Иҭахаз рыуацәеи рҭынхацәеи ҳрыдышшылоит, ахәрақәа зауз ргәабзиара шьақәгыларц рзеиӷьаҳшьоит.
«Крокус Сити Холл» аҿы иҟалаз атеракт аан уажәазы иҟоу адыррала иҭахази ахәрақәа заузи рыбжьара Аԥсны атәылауаа ыҟаӡам. Ацҳаражәҳәарҭа Аоперативтә штаб иамадоуп, иҟоу аинформациа иацклаԥшуеит», - ҳәа иҳәеит ацҳаражәҳәаҩ.
Москва иҟоу Аԥсны Аҳәынҭқарра Ацҳаражәҳәаҭа Москва амҵан ахәылбыҽха, хәажәкырамза 22 рзы иҟалаз атеракт азы адыррақәа Аԥсны атәылауаа ирынаҭалоит.
