Аҟәа. Хәажәкырамза 19, 2024 шықәса. Аԥсныпресс. Аԥснытәи аӡиудоистцәа Ҟрыми Севастополи Урыстәыла радлара ҟалеижьҭеи 10-шықәса аҵра иазкны Симферополь имҩаԥысуаз арегионбжьаратәи атурнир аҿы 18 шықәса зхымҵыц арԥарцәеи аҭыԥҳацәеи рыбжьара ахьтәы медалки х-раӡны медалки роуит.
Нестор Арсҭаа, ԥшь-еиндаҭларак аҿы аиааира анига ашьҭахь, 55 кьыла рҟынӡа инаӡо акапантә категориа иаҵанакуа рыбжьара актәи аҭыԥ игеит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.
Арԥарцәа рыбжьара ахԥатәи аҭыԥқәа ааныркылеит Лука Гогохиа (ак/к. 50 к.), МатвеИ Хонӡиа (ак/к. 60 кь.), Софиа Аведиан 53 кьала иҟоу акапантә категориа иаҵанакуа аҭыԥҳацәа рыбжьара ахԥатәи аҭыԥ аанылкылеит.
Акоманда азыҟарҵеит Беслан Арсҭааи Роберт Новоиани.
Атурнир мҩаԥысуан хәажәкрамза 13 инаркны хәажәкырамза 15-нӡа Симферополь ақалақь аҿы. Уи зынӡа рхы аладырхәит Урыстәылатәи Афедерациа еиуеиԥшым арегионқәа, иара убас Ареспублика Аԥсны рҟынтәи 300-ҩык инареиҳаны аспортсменцәа.
