---
Иуа Абас-иԥа Коӷониа диит хәажәкырамза 13, 1904 шықәса рзы Очамчыра араион Кәтол ақыҭан абжьыуаа рҿы ахьӡ змаз аҽыбӷаҟаза, анхаҩы иҭаацәараҿы. Абас Коӷониа ԥсыуа нхаҩык иаҳасабала унеишь-уааишь ҳәа ззырҳәоз уаҩын, насгьы ажәабжьқәа идыруан, ибзиангьы иҳәон.
Д. И. Гулиа иаԥшьгарала иаартыз Кәтолтәи ақыҭашкол даналга ашьҭахь, 1919 шықәса инаркны Аҟәатәи арҵаҩратә семинариа (анаҩс арҵаҩратә техникум) аҿы аҵара иҵон. Асеминариа аҿы аҵара аниҵоз иара алитературатә кружок аусуреи анапылаҩыратә журнал «Ашарԥы-еҵәа» аҭыжьреи активла ихы алаирхәан.
1924 – 1925 шш. рзы Аҟәа ақалақь аҿы аус ауан Иуа Коӷониа ила еиҿкааз алитературатәи адраматәи акружокқәа; иара инапхгарала иҭыҵуан анапылаҩыратә журнал «Аҿар рыбжьы». Акружокқәа рхықәкы хаданы иҟан — ақалақьқәеи ақыҭақәеи рҿы акультура-рккаратә усура амҩаԥгара, ахатәы бызшәа аиқәырхара, уи арҿиара, ауааԥсыра рҵарадара аԥыхра, алитерато ҿарацәа раарԥшра.
1925–1928 шш. И. Коӷониа – дцеит иреиҳау аҵарахьы, дҭалеит Москватәи Аҳәынҭқарратә журналистика Аинститут. Москва иара аамҭала аԥснытәи агазеҭқәа рзы москватәи акорреспондентс дыҟан, ирзааишьҭуан аҳҭнықалақь аҿтәи акультуратә ҟазшьа змаз ажәабжь ҿыцқәа.
Иуа Коӷониа Москва даныҟаз ицәыԥсит бзиа иибоз, аџьабаа ду идызбалахьаз иаби иаб иаҳәшьа Камеи. Урҭ рыԥсҭазаара алҵра иара даара игәы еиҵанархеит. Аҭаацәа ду аныҟәгаҩ ида иаанхеит.
Аинститут дахьҭаз Иуа Коӷониа аҳәынҭқарратә стипендиа ширҭозгьы, иара убас Аԥснытәи Жәлар Ркомиссарцәа Рхеилак аҟынтәи ацхыраара шиоуазгьы, зны-зынла ацхыраара ихьымӡакәа ԥарада дықәхалон, ифатә-ижәтә ишәҵатәы иагхон. Аӡын И. Коӷониа ашкол ахь данзымцоз ҟалалон иахәҭаз ашьаҵатәы амамзаара иахҟьаны. Абри иахҟьазгьы ыҟоуп игәабзиара ауашәшәырахараҿы. Аинститут далгаанӡа, ӷәӷәала дычмазаҩны Аҟәаҟа дааргеит. Иԥсҭазаара аҵыхәтәантәи амшқәа рзы иара дышьҭан Ахәҵа аҳаблан, Ҳаџьараҭ Аӡынба иҩнаҭаҿы. Араҟа ауп иара ԥхынгәымза 14, 1928 шықәсазы иԥсҭазаара дахьалҵызгьы. Ашьҭахь иԥсыбаҩ Кәтолҟа ииаган.
И. Коӷониа данхәыҷыз инаркны жәлар рҿаԥыц рҿиамҭақәа, алакәқәа, афырхаҵаратә ҳамҭақәа, жәлар рпоезиа, ажәаԥҟақәеи ажәарццакқәеи дрызҿлымҳан. Рыҩнаҭа лассы-лассы иаҭаалон Чагә Чаҵә иеиԥш иҟаз еицырдыруаз ажәабжьҳәаҩцәа. Ишнеи-шнеиуаз афольклортә материалқәа шьаҭас иаиуит ипоезиа, еиҳаракгьы ипоемақәа.
Агәаанагара злаҟоу ала, ажәеинраалақәа рыҩра далагеит арҵаҩратә семинариа данҭаз, аха арҭ арҿиамҭақәа, уи ифольклортә нҵамҭақәа реиԥш еиқәымхаӡеит. Иуа Абас-иԥа Коӷониа иҩымҭақәа акьыԥхь рбо иалагеит 1920 шықәса инаркны. Раԥхьатәи истатиа «Аҵара шаҟа хәарҭара алоу!» анылеит агазеҭ «Аԥсны» (1920, №8), раԥхьатәи иажәеинрала «Аӷьыч рыцҳа» акәзаргьы, ари агазеҭ ианылеит (1920, №9).
Иуа Коӷониа авторс дрымоуп апоемақәа ааба («Абаҭаа Беслан», «Наҩеи Мзауҷи», «Хмыҷ шәарыцаҩ», «Маршьанаа шықәибахыз», «Зосҳан Ачбеи Жанаа Беслан иԥацәеи», «Мшәагә кьаҿи Папба Рашьыҭи», «Ашәаныуа Мырзаҟан», «Ашәба Данаҟаи аҟарач Баҟәыҟәи»). Апоемақәа 1924-1925 шш. раан Кәтол ақыҭан иҩуп. Урҭ апоет ихаҭа дызхааныз аԥсуаа ажәытәтәи рыԥсҭазаара иазкуп. Убри аҟнытә, апоет дықәгылоит хьӡыртәҩык иаҳасабала, аобиективтә-епикатә форма змоу ажәабжь еиҭаҳәаҩык иакәны. Урҭ ртема хадақәас иҟоуп – аиҩызара, агәрагара, ачарҳәара, афырхаҵара, аҳаҭыр, ашьаура. Апоемақәа ҩуп жәлар рҳәамҭақәеи ражәабжьқәеи рышьаҭала. Апоет ҟазарала ихы иаирхәоит афольклортә сиужетқәа, бызшәа лыԥшаахлагьы ицәыригоит. Апоемақәа зегьы рҟны апоет ихшыҩзышьҭра хадаҿы иҟоуп Аԥсуара, амилаҭтә етика, уи аныҟәгашьа.
И. Коӷониа иԥсы ҭанаҵы иҭыҵит ипоемақәа рышәҟәы «Апоемақәа. Ажәытә ажәабжьқәа» (Аҟәа, 1925). Ашьҭахь иҩымҭақәа реизгақәа зныкымкәа иҭыжьын. Иажәеинраалақәеи ипоемақәеи рнылон ажурналқәа: «Алашара», «Амцабз», «Аҟәа-Сухум», агазеҭқәа: «Аԥсны ҟаԥшь», «Еҵәаџьаа», рыхәҭак агәылалеит «Аԥсуа поезиа антологиа. ХХ ашә» . (Аҟәа-Москва, 2001; аиҭаҭыжьра – Аҟәа–Москва, 2009) уҳәа егьырҭгьы.
И. Коӷониа иажәеинраалақәа аурысшәахь еиҭаргеит Б. Брик, Д. Голубков, И. Левитански, Р. Казакова, Д. Чачхалиа. Аиҭагақәа кьыԥхьын «Аԥсуа поезиа антологиа» (урысшәала, М., 1958), агазеҭ «Советская Абхазия» уҳәа рҟны, хазы шәҟәқәангьы иҭыҵхьеит.
Аиҭагақәа анылон «Антология абхазской поэзии» (М., 1958), агазе «Советская Абхазия», хазы игоу аҭыжьымҭақәа ҭыҵуан. Убас аҭыжьымҭақәа аԥсышәала: Апоемақәа, Ажәытә жәабжьқәа. Аҟәа, 1925; Ажәытә жәабжьқәа. (Апоемақәеи ажәеинраалақәеи аԥсуаа рыбзазашьа аҟнытә). Аҟәа, 1934: Ажәеинраалақәеи апоемақәеи. Аҟәа, 1955; Ажәеинраалақәа. Аҟәа, 1969; Иҩымҭақәа. Ажәеинраалақәа. Апоемақәа. Астатиақәа. Асалам шәҟәқәа. Аҟәа, 1974; Иҩымҭақәа. Аҟәа, 2015; аурысшәахь аиҭагақәа: Избранное. Стихи и поэмы. М., 1971; Стихи и поэмы. Сухуми, 1972.
