Аҟәа. Хәажәкырамза 13, 2024 шықәса. Аԥсныпресс. Хәажәкырамза 12 рзы Аԥсны ахәыҷы изинқәа рыхьчаразы Азинмчы змоу Иаппарат аофис аҿы имҩаԥысит араҟа иаԥҵаз Ауаажәларратә Хеилак аҩбатәи аилатәара.
Аилатәара иалахәыз Ауаажәларратә Хеилак аҿаԥхьа иқәгылоу ахыдҵақәа рынагӡара азы ауснагӡатәқәа ирылацәажәеит. Урҭ рхыԥхьаӡараҿы иҟоуп:
- Ахәыҷқәеи ахбыџқәеи урҭ рҭаацәеи рзы апроект «Агәрагара аҭел» аиҿкаара алыршара;
- аусуратә гәыԥқәа рышьақәыргылареи урҭ реилазаареи инарыгӡало аусура ахырхарҭақәеи ралкаара;
- аҵарадырреи анаукеи абызшәатә политикеи адинхаҵареи амассатә информациа ахархәагақәа русқеи рзы Жәлар Реизара-Апарламент Аилак ахантәаҩы иԥылара аиҿкаара азҵаара;
- апрофилактикатә медицинатә маҵзура аҩаӡара ашьҭыхреи ашколнӡатәи аусбарҭақәеи ашколқәеи рҿы акрыфара ахаҭабзиара аиӷьтәреи рзы амеханизмқәа рышьақәыргылара.
Иалацәажәеит иара убас Акризистә Центр аартреи уи иадҳәалоу изаамҭанытәиу азҵаарақәа рыӡбареи.
Аилатәара рхы аладырхәит Аԥсны Аҳәынҭқарра аҿы ахәыҷы изинқәа рыхьчаразы Азинмчы змоу Мактина Џьынџьалԥҳа, Ахәыҷы изинқәа рыхьчаразы Азинмчы змоу Иаппарат аҟны еиҿкаау Ауаажәларратә Хеилак ахантәаҩы Инна Барчан, Ауаажәларратә Хеилак алахәылацәа Арда Инал-иԥа, Кәыҵниа К. Л., Матуа А. З., иара убас Подолианко А. А.
