Аҟәа. Хәажәкырамза 13, 2024 шықәса. Аԥсныпресс. Аԥсны аԥыза-министр Алеқсандр Анқәаб Ливан еиҿкаау «Ачерқьесстә ассоциациа» ахада Риад Цыба зхадараҿы дыҟоу ливантәи аԥсуа диаспора ахаҭарнакцәа идикылеит. Абри атәы аанацҳауеит Аминистрцәа реилазаара апресс-маҵзура.
Ҳџьынџьуаа рҭоурыхтә ԥсадгьыл ахь рырхынҳәразы аҳәынҭқарратә Еилакы ахантәаҩы Вадим Ҳаразиеи Жәлар Реизара-Апарламент адепутат Насоу Салаҟаеи злахәыз ари аиԥылара аҿы агуманитартә хырхарҭеи егьырҭ азҵаарақәа рыла ареспубликеи ливантәи адиаспореи русеицуреи ирыдҳәалоу азҵаарақәа ирылацәажәеит, иара убас ҳџьынџьуаа рҭоурыхтә ԥсадгьыл ахь рырхынҳәразы ирымоу алшарақәа ирзааҭгылеит.
«Акыр шықәса ҳаиҟәыҭханы ҳшыҟазгьы, ҳабацәеи ҳабдуцәеи рыдгьыл аҭааразы алшара шҳамамызгьы, ҳара есымша Аԥсны имҩаԥысуа апроцессқәа зегьы ҳрызҿлымҳан. Уажәы амҩақәа анааты, алшара ҿыцқәа анцәырҵ, ҳара иаҳҭахуп Ҳаԥсадгьыл иахәаша џьара акы ҟаҳҵарц», - ҳәа аԥыза-министр аԥсшәа иаҳәо иазгеиҭеит адиаспора аԥыза Риад Цыба.
Ахәҭакахьала, Алеқсандр Анқәаб ауаажәларра рыхдырраҿы, иара убас аҳәынҭқарра анапхгара инанагӡо аполитика аҿы адиаспора аусацура хадара злоу ахықәкқәа ишыруаку азгәеиҭеит. Аԥыза-министр иажәақәа рыла, ареспублика анапхгара ҳаԥхьаҟагьы аҳәаанырцә иҟоу ҳџьынџьуаа рымадареи аус рыцуреи иазхиоуп.
