Аԥырратә дәаҿы нап аркуп аԥырра-тәарҭатә цәаҳәақәа рырҽеира, иара убас аҿықәқәа ррыцқьара. Ажәытә хыбрақәа рықәгаразы аусурақәа цоит.

Аԥсны Аҳәынҭқарра Иҷыдоу аҭагылазаашьақәа рзы Аминистрра амчала имҩаԥгоуп артҟәацгатә маҭәашьарқәа рыԥшааразы ауснагӡатәқәа, иара убас уи аҵакыраҿы аҵлақәеи ачықьқәеи ррыцқьара.

Аҳәынҭқарра Ахада Аслан Бжьаниа инаҵшьны иазгәеиҭеит аҳаиртә баӷәаза аиҭашьақәыргыларазы ҳаамҭа иақәшәо, насгьы зхаҭабзиара ҳараку ауснагӡатәқәа шымҩаԥгатәу. Аҭакԥхықәра зду ауаа ирыдиҵеит апроект алахәылацәа зегьы русура иарбоу аҿҳәара инақәыршәаны ишахәҭоу еиԥш иҳәаақәҵазарц.

30 шықәса раахыс ус игылоу Жәларбжьаратәи аҳаиртә баӷәаза «Аҟәа» ареконструкциа  Аԥсны аҳәынҭқарразы акрызҵазкуа, аҭоурыхтә ҵакы змоу апроектқәа иреиуоуп. Аҳаиртә баӷәаза ареконструкциа  анхыркәшахалак анаҩс, жәларбжьаратәи астандартқәа ирықәшәо иҟалоит, еиуеиԥшым аҳаирплан хкқәа аднакылоит. Ари аҩыза аинвестициатә проект анагӡара иалнаршоит атәылауаа транспортла реиқәыршәара, иара убас аԥсшьаҩцәа рхыԥхьаӡара аизырҳара, атәыла аекономикатә ҿиара ӷәӷәала ацхраара.

Аслан Бжьаниа ҷыдала хылаԥшра аиҭоит апроект аусура, уи  раԥхьатәи аҵакы азгәаҭаны. Аҟәатәи аҳаиртә баӷәаза апроект ареконструкциа шаҳаҭра ауеит атәыла анапхгара Аԥсны аизҳазыӷьаразы аҭагылазаашьа бзиақәа раԥҵара ишадгыло. Абри азы адырра ҟанаҵоитАҳәынҭқарра Ахада ипресс-маҵзура.