Раԥхьаӡа акәны Хьыбла Герзмааԥҳа иаԥшьылгаз Жәларбжьаратәи авокалистцәеи аконцертмеистрцәеи рконкурс  мҩаԥган  ажьырныҳәамза 11 -22, 2023 шықәса рзы. Усҟан аконкурс рхы аладырхәит Урыстәыла, Белоруссиа, Азербаиџьан, Ермантәыла, Бразилиа, Ҟазахсҭан, Китаи, Монголиа, Франциа, Алада Африкатәи Ареспублика рҟынтәи 35-ҩык аопертә вокалистцәеи  16-ҩык аконцертмеистрцәеи. Зынӡа аконкурс алахәхаразы адунеи 38 тәыла аҟынтәи  анагӡаҩ ҿарацәа рҟынтәи иаарышьҭит 800 рҟынӡа азыҳәамҭақәа.

Хьыбла Гьерзмааԥҳа – Урыстәылеи Аԥсни Жәлар рартистка, Урыстәылатәи Афедерациа Аҳәынҭқарратә премиа занашьоу, Станиславскии Немировичи-Данченкои рыхьӡ зху Москватәи академиатә музыкатә театр асолистка Хьыбла Гьерзмааԥҳа аурыси адунеитәи оператә ҟазара арҿиараҿы реиҳа иналукааша аоператә шәаҳәаҩы.

Хьыбла Герзмаа — аоператә сцена апримадонна ҳәа дазхаҵоуп. Ахаризма злоу, акы иаламҩашьо абжьы хаа змоу Хьыбла Герзмаа аклассикатә ариақәа рҿы еиԥш аџьазтә имправизациақәа рыҿгьы еиԥшны ибзиаӡаны дықәгылоит. Уи лзыӡырҩцәа акы иаламҩашьо лыбжьы атембри зыҩаӡара ҳараку лынагӡара атехникеи актиортә ҟазареи рыла илтәылтәуеит.  Аоператә нцәахәы Хьыбла Герзмааԥҳа  — аурыси адунеитәи оператә ҟазара арҿиараҿы реиҳа иналукааша аоператә шәаҳәаҩы, уи афиша аҿы лыхьӡ — иарбан тәылазаалакгьы аҿы аншлаг шыҟало арҵабыргуеит. Амузыка гәыла-ԥсыла иазыҟоу Хьыбла Герзмааԥҳа – иахьа адунеи аоператә сценақәа рыҟны азҿлымҳара ду змоу шәаҳәаҩуп. Лара дықәгылоит иреиӷьӡоу аконцерттә сцена дуқәа - Ла Скала, Ковент-Гарден, Метрополитен-опера, Бавариатәии Римтәии атеатрқәа рыҟны, Венатәи аопера аҟны. Ашәаҳәаҩ адунеи акыр џьара аконцерттә программақәа лыманы агастрольқәа мҩаԥылгоит. Аха уи анаҩс Хьыбла Герзмааԥҳа иара убас Москватәи аконсерваториа аҿы асолотә шәаҳәара акафедра адоцентс дыҟоуп, лара амузыкатә фестиваль «Хьыбла Герзмааԥҳа шәаалыԥхьоит…» аԥҵаҩыси анаԥхгаҩыси дыҟоуп, иара убас Жәларбжьаратәи авокалистцәеи аконцертмеистрцәеи рконкурс ашьаҭаркҩыс дыҟоуп.