Гәылрыԥшь араион ахада иаҵшьны иҳәеит аекономикатә рбагақәа абиуџьет ахь ааимҭақәа ирыцҵаны рааира шалдыршаз.
«Ари иабзоураны аԥаратә хархәагқәа дәықәҵан араион анхамҩатә обиектқәа рматериал-техникатә база арӷәӷәарахьы, ҳауаажәлар, абиуџьеттә усхк аҟны иҟоу ауааԥсыра рҭагылазаашьа аиӷьтәрахь: аҵараиураҟны, агәабзиарахьчараҟны, акультураҟны, иуашәшәыроу ауааԥсыра аматериалтә цхыраара рыҭарахь. Иааизакны, араион аҟны адотациақәа, асубсидиақәа, атрансферқәа 2023 шықәсазы идыртәеит 189,5 млн мааҭ», - иҳәеит иара.
Саид Ҳаразиа араион Администрациа аусураҟны ихадараны иазгәеиҭеит ақыҭауаа рҭагылазаашьа аиӷьтәра. Уи иажәақәа рыла араион аекономикатә лшара дуқәа амоуп еиуеиԥшым ахырхарҭақәа рыҟны, атуризм аусхкгьы налаҵаны.
Иара убас Администрациа анапхгаҩы Аҳәынҭқарра Ахада адырра ииҭеит 2023 -2025 шш. Аԥсны Аҳәынҭқарра Асоциал-економикатә ҿиара ацхрааразы аинвестициатә программа амҩаԥысшьазы. Иҳәеит инагӡахараны ишыҟоу 177, 3 млн мааҭ рыхә апроектқәа 5. 2023 ш. инаркны 2025 шықәсанӡа ишазԥхьагәаҭаз араион аҟны амҩақәа 4 шьаҭанкылатәи рырҽеира 131, 9 млн мааҭ рыхә, ҩ-мҩакы рыла аусурақәа харҭәааны ишынагӡоу, агьырҭ аҩба рыҟны аусура шцо.
Аҳәынҭқарра Ахада иаҵшьны иҳәеит зегьы иреиҳау апроект аҳаиртә баӷәаза аиҭашьақәыргылара иазку иамоу аҵак ду.
«Мшаԥымза-лаҵарамзазы ихацыркхоит ареспубликатә мҩа ду аиҿкааразы аусура. Аҭыԥантәи амчхарақәа русбарҭақәа ианаҭахха ацхыраара ҟарҵароуп, зегьы шәеидгыланы ареспубликатә мҩа ду ишақәнагоу иҟашәҵароуп, - иҳәеит Аҳәынҭқарра Ахада. Убри аан амҩа иаԥну аҭыԥқәа рыҟны шьаҭанкылатәи аобиектқәа рыргылара ҟамлароуп», - ҳәа ацҵаны.
Аслан Бжьаниа иара убас Гәылрыԥшь араион Администрациа ахада инапы ианиҵеит аҵара аминистрраеи дареи еидгыланы изыхәҭоу адокументқәа реиқәыршәара, аҭыԥқәа ралхра, ашколқәа зегьы рыҟны аспорттә шҭақәа рыргыларазы апроект анагӡара дырццакырц.
Саид Ҳаразиа иҳәеит ари азҵаара аӡбара нап шадыркуа.
Аҳәынҭқара Ахада Гәылрыԥшь араион аҟны имҩаԥысуа аусура алҵшәақәа цәгьаӡам ҳәа ахә ишьеит, аусура алҵшәақәа рышьҭыхразы иацҵаны аусура амҩаԥгара иазхьарԥшны.
