Аҟәа. Жәабранмза 28, 2024 шықәса. Аԥсныпресс. Жәлар Реизара-Апарламент адепутатцәа иахәаԥшит аҩбатәи аҵыхәтәантәи аԥхьарала иагьрыдыркылеит «Аԥсны Аҳәынҭқарра жәларбжьаратәи аиқәшаҳаҭрақәа рзы» Аԥсны Аҳәынҭқарра Азакәан аԥсахрақәа ралагаларазы» азакәан апроект.
Ажәахәҟаҵаҩ – Жәларбжьаратәии апарламентбжьаратәи еимадарақәеи аџьынџьуаа рымадареи рзы Аилак ахантәаҩы Барцыц Алхас.
Азакәан апроект иазԥхьагәанаҭоит Аԥсны иаднакыло аиқәшаҳаҭрақәа нап рыҵаҩра ҟалаанӡа урҭ Жәлар Реизара ардырра.
Иара убасгьы иалацәажәан жәларбжьаратәи аиқәшаҳаҭрақәа рпроектқәа Апарламент ахь рнагара аҿҳәаратә аамҭа.
Азакәан иалагалахо аиҭакрақәа инарықәыршәаны, Аҳәынҭқарра Ахада Аԥсны Аҳәынҭқарра ахьӡала ибжьаҵахо жәларбжьаратәи аиқәшаҳаҭрақәа нап рыҵаҩразы аӡбамҭа адкылара ҟалаанӡа 10-мыш шыбжьоу урҭ Жәлар Реизара ардырразы анагара алиршоит.
Аминистрцәа Реилазаара уи ахьӡала иаднакыло жәларбжьаратәи аиқәшаҳаҭрақәа рыпроектқәа анапаҵыҩразы аӡбамҭа адкылара ҟалаанӡа 10-мыш шыбжьоу урҭ Жәлар Реизара ардырразы анагара алнаршоит.
Адәныҟатәи аусқәа Рминистрра убасҵәҟьа анапхгарабжьаратәи ҟазшьа змоу жәларбжьаратәи аиқәшаҳаҭрақәа рыпроектқәа анапаҵыҩразы аӡбамҭа адкылара ҟалаанӡа 10-мыш шыбжьоу урҭ Жәлар Реизара ардырразы анагара алнаршоит.
Хыхь иарбоу жәларбжьаратәи аиқәшаҳаҭрақәа рнапаҵыҩра залыршахом урҭ ишьақәыргылоу аҽҳәарақәа ирҭагӡаны Жәлар Реизара ардырразы анагарада.
Аԥсны адәныҟатәи аусқәа Рминистрра ибжьаҵаз, иара убас ззинмчы аамҭала иаанкылаз, мамзаргьы иаԥыхыз Аԥсны Аҳәынҭқарра жәларбжьаратәи аиқәшаҳаҭрақәа рзы адырра Апарламент ахь инанашьҭуеит. Убри инамаданы адепутатцәа «аратификациа иаҵанамкуа аиқәшаҳаҭрақәа ареспублика азакәан иазыԥхьагәанаҭо аԥҟарақәа рыда аҽа ԥҟарақәак рышьақәыргылара алмыршара» азы азакәан аиҭакрақәа ралагаларазы аӡбамҭа рыдыркылеит.
