Иара убас уи иҭабуп ҳәа еиҳәеит Урыстәылатәи Афедерациа  аспорт аминистр Матыцин Олег Уасил-иԥа иҟаиҵаз ацхырааразы, «аҭаацәа ду ирыхәҭакны аҟаларазы ироуыз алшаразы».

Аусмҩаԥгатә аҟны иҟаҵан иҳаҩсыз ашықәс азы аилак аусуразы авидеоҳасабырба. 

Аҳәынҭқарра Ахада аиԥылара иалахәыз иҭабуп ҳәа реиҳәеит иахьатәи Аԥсны аҭоурых аҟны рлагаламҭазы. «Аԥсны аҿар жәларбжьаратәи аицлбарақәа иахьрылахәу иаҳәо рацәоуп, ари иаанаго ҳазну амҩа иашоуп ҳәа ауп», - иҳеит  Аслан Бжьаниа. Уи иара убас иазгәеиҭеит имҩаԥысраны иҟоу аилацәажәара атәгьы, иара хықәкыс ишаиуа аԥснытәи аҿар 9-ҳәынҭқаррак злахәу аҳәынҭқарратә еидгылара атәылақәа рыхәмаррақәеи Адунеизегьтәи Аиҩызара ахәмаррақәеи рылархәра аиҿкаара иазку апроблемақәа рыхцәажәара. Ахада ахәмаррақәа ирылахәхо зегьы ирзеиӷьеишьеит аиааира дуқәа. «Сара агәра згоит Аԥсны ахаҭарнакцәа иреиӷьу ауаҩытәҩсатә, аинтеллектуалтә, ҳәарада, аспорттә ҟазшьақәа раарԥшра шрылшо», - иҳәеит Ахада, иажәа хыркәшо.

Аиԥылараҟны иара убас иқәгылеит , аилак ахантәаҩы ихаҭыԥуаҩә Роман Цкуа. Уи инарҭбааны далацәажәеит аԥснытәи аспортсменцәа злахәхараны иҟоу жәларбжьаратәи аҩаӡара змоу аспорттә усмҩаԥгатәқәа, аиԥылара иалахәыз рызҵаарақәа рҭакқәа ҟаиҵеит.

Аиԥылара иалахәын Аԥсны Апараламент Аиҳабы Ашәба Лаша, Ахада Иадминистрациа Анапхгаҩы Абесалом Кәарҷиа.