Аҟәа. Жәабранза 22, 2024 шықәса. Аԥсныпресс. Гал араион ашколқәа рҵаҩцәа араион аҵара аҟәша аиҳабы Екатерина Габелиа лнапхгарала аҵара аҟәша аусзуҩцәа рыцны жәабранмза 21 азы Дырмит Гәлиа Илитература-мемориалтә аҩны-амузеи иаҭааит. Ашколхәыҷқәа рзы амузеи аҿы аекскурсиа мҩаԥыргеит, иддырбеит, ирзеиҭарҳәеит зегьы реиҳа аинтерес зҵоу амузеитә експонатәқәа ртәы.
Ашколхәыҷқәа Дырмит Гәлиа иажәеинраалақәа аԥсышәала иаԥхьеит.
Аԥсуа литература ашьаҭаркҩы Дырмит Иасыф-иԥа Гәлиа диижьҭеит 150-шықәса аҵра инамаданы Галынтәи аделегациа амузеи ҳамҭас ианаҭеит 170 нызықь мааҭ, ҳәа адырра ҟанаҵоит «Гал-медиа».
«Аҵара аҟәша аҿы изаамҭанытәиу аилатәара анымҩаԥаагоз, ҳара иҳаӡбеит Гал араион аҿы инхо ахәыҷқәеи арҵаҩцәеи рҟынтәи маҷк иадамзаргьы алагала аҟаҵара. Иҟоу 19 школ зегьы, ирылшоз ала абри аԥаратә хархәагақәа еизыргеит. Ахәыҷқәа зегьы доусы ирылшоз ала рлагала аларҵеит», - ҳәа еиҭалҳәеит Екатерина Габелиа.
Аҩны-амузеи адиректор Светлана Қорсаиа лажәақәа рыла, арҭ аԥаратә хархәагақәа зегьы сынтәа зымҩаԥгара азԥхьагәаҭоу аиҭашьақәыргыларатә усурақәа рахь идәықәҵахоит.
