Аҟәа. Жәабранмза 21, 2024 шықәса. Аԥсныпресс. Аԥсны аиустициа аминистр Анри Барцыц Аҳәынҭқарра Ахада иҿы 2023 шықәса рзы Аԥсны Аҳәынҭқарра аиустициа Аминистрра аусура азы аҳасабырба ҟаиҵеит.
«Иҳаҩсыз ашықәс алҵшәа бзиа аман. Аус рыдаҳулеит аиҿкаара-хылаԥшратә докәментқәа, урҭ зегьы аиустициа Аминистрра аусура аиӷьтәра иазкын, иара убас аппаратқәа рыҟәшақәеи, аструктуратә напхгарақәеи, анапаҵаҟа иҟоу аиҿкаарақәеи русеицзура аимадара ацхыраара анаҭон»,- ҳәа иҳәеит Анри Барцыц.
Аминистр иажәақәа рыла, 2023 ш. рзы аӡбаратә уснагӡатәқәа рмаҵзурақәа русура ахаҭабзиара аиӷьтәразы аусурақәа ирыцҵан.
Анри Барцыц иазгәеиҭеит, хазхаҭалатәи анаплакҩцәа рхыԥхьаӡара ишацлаз. Аҳасабырба аамҭазы ашәҟәы иҭагалан 580 аиуристтә хаҿқәа (510 - 2022 ш.) 1291 хаҿы (1251 - 2022 ш.).
2023 шықәса рзы Аԥсны ашәҟәы иҭагалан амассатә информациатә хархәагақәа 2, урҭ рахьтә акы - аинтернет саит, иара убас ажурнал, адырраҭаразы алицензиақәа 3 рыҭан.
Аҳәынҭқарра Ахада аҳәара ҟаиҵеит инарҭбааны еиҭеиҳәарц аусбарҭаҟны иалагалоу аҿыцрақәеи, урҭ рылҵшәеи ртәы. Ахәҭакахьала, уи зызкыз Аҟәа ақалақь анотариалтә конторақәа рҟны ишьақәыргылаз атерминалқәа роуп, аҳәынҭқарратә ҳазалхратә баџь ашәаразы. «Аԥсны абанкқәа руак аппаратқәа рышьақәыргылараҟны иҳацхрааит, атәылауаа анотариалтә усқәа рымҩаԥгараҟны акырӡа ацхыраара рызҭоз. Аха, ашәарҭара цәырҵит ахаҭара шьақәзыргыло ахьӡқәа рцәыӡра аус инамаданы, апрограмматә еиқәыршәара ахьынагӡам азы. Ари азҵаара аӡбаразы амҩақәа рыԥшаара ҳаҿуп», - ҳәа иҳәеит аиустициа аминистр.
Аусбарҭаҟны азҿлымҳара ду арҭоит акадртә политика. Аиустициа Аминистрра аусзуцәеи Аԥсны Аҩныҵҟатәи Аусқәа Рминистрра аусзуцәеи, Урыстәыла Адәныҟатәи Аусқәа Рминистрра Адипломатиатә Академиа аҟны рԥышәа аизырҳаразы акурсқәа ирхысит. Азыҟаҵарақәа мҩаԥыргон Академиа апрофессор-арҵаҩратә еилазаара ахаҭарнакцәа, ааԥхьара рыҭан Адәныҟатәи Аусқәа Рминистрра аекспертцәеи, Урыстәыла егьырҭ аусбарҭақәеи. Иара убас, Аԥсны Аҳәынҭқарра Аиустициа Аминистрра аусзуцәа Нхыҵ-Кавказтәи афедералтә университет аҟны рԥышәа аизырҳаразы арҵаратә программа иахысит.
2023 шықәса лаҵарамза 11 инаркны 13-нӡа, аиустициа Аминистрра анапхгара Урыстәылатәи Афедерациа Аиустициа Аминистр К. А. Чуиченко иҟаиҵаз ааԥхьарала, рхы рыладырхәит ажәеизатәи Петербургтәи жәларбжьаратәи азиндырратә форум. Петербургтәи Жәларбжьаратәи Азиндырратә Форум атема хада - 2023 , иара убас апленартә еилатәара – «Асуверенитет азин амоуп».
