«Иҭабуп ҳәа шәасҳәар сҭахуп ҳреспублика азы акыр иуадаҩыз аамҭазы – Аџьынџьтәылатәи аибашьра анцоз аамҭа азы, Шәара иҳашәҭаз адгылареи ацхыраареи рзы.  Шәара зегьрыла ҳажәлар адгылара рыҭара алшәыршон, рааигәара шәыҟан, рыуадаҩрақәеи ргәырҩеи рыцеиҩышәшон. Уи адгылара ҳара иахьагьы иаҳныруеит. Шәааԥсареи шәылшамҭақәеи ҳасаб рзуны, Аҳәынҭқарра Ахада Аслан Бжьаниа иреиҳаӡоу аҳәынҭқарратә ҳамҭа  – «Ахьӡ-Аԥша» аорден шәанашьара азы Аусԥҟа инапы аҵаиҩит.  Сара даҽазныкгьы иҭабуп ҳәа шәасшәарц сҭахуп Аԥсни Ҟарачы-Черқьессиатәи Ареспубликеи  рыжәларқәа рыиашьаратә еизыҟазаашьақәа рырӷәӷәареи рыҿиареи рзы  иҟашәҵаз алагала ду азы. Агәра ганы сыҟоуп ҳажәларқәа ирыбжьоу аимабзиаратә, аиашьаратә еизыҟазаашьақәа аринахысгьы аҿиара шаиуо.   Ишәыдысныҳәалоит ари аҳамҭа аиура», - ҳәа иҟаиҵаз адныҳәаларатә ажәахә аҿы иазгәеиҭеит Бадра Гәынба. 

Абу-Иусуф  Банов ареспублика анапхгара  иусура иарҭаз ахәшьара ҳаракы азы иҭабуп ҳәа иҳәеит.