Аҟәа. Мшаԥымза 10, 2023 шықәса. Аԥсныпресс. А.Н. Островски диижьҭеит 200-шықәса аҵра инамаданы имҩаԥысуа ХХV аиубилеитә Жәларбжьаратәи афестиваль «Урыстәыла имҩаԥысуа аиԥыларақәа» аҳәаақәа ирҭагӡаны Санкт-Петербург ақалақь аҿы, атеатр-фестиваль «Балтийский дом» асцена аҿы ахәаԥшцәа аспектакльқәа дырбара иалагеит.
Афестиваль рхы аладырхәуеит Аԥсны, Азербаиџьан, Ермантәыла, Ҟазахсҭан, Белорусиа, Киргизиа, Донецк, Ҭаџьыкьысҭан, Туркмениа, Узбекистан рҟынтәи атеатралтә коллективқәа.
Ф.А. Искандер ихьӡ зху аурыс драматә театр Мшаԥымза 12, 13, 14 рзы Ф. Искандер ихьӡ зху Аурыс драматә театр, аиубилеитә жәларбжьаратәи афестиваль «Урыстәыла имҩаԥысуа аиԥыларақәа» аҳәаақәа ирҭагӡаны Санкт-Петербург ақалақь аҿы, атеатр-фестиваль «Балтийский дом» асцена аҿы ахәаԥшцәа х-спектакльк днарбараны иҟоуп. Мшаԥымза 12 рзы, А.Н. Островски иира Амш аҽны (хәажәкырамза 31 [мшаԥымза 12] 1823 ш. — рашәарамза 2 [14] 1886 ш.) ахәаԥшцәа идырбахоит аурыс драматург иеихьӡылоу икомедиа ала иқәыргылоу аспектакль «Ахаҵа ԥшӡа». Мшаԥымза 13 рзы петербургтәи ахәаԥшцәа идырбахоит Фазиль Искандер иеихьӡылоу иповест ала иқәыргылоу аспектакль «Софичка». Мшаԥымза 14 рзы идырбахоит испаниатәи адраматург Федерико Гарсиа Лорки иԥсҭазаареи ирҿиарамҩеи иазку аспектакль «Аԥынгыларақәа зегьы ириааиуа агәырӷьара» («Радость вопреки всему»).
Афестиваль мшаԥымза 16 рҟынӡа имҩаԥыслоит. Уи Урыстәылатәи Афедерациа акультура Аминистрра, Санкт-Петербург акультура азы Акомитет, Урыстәыла атеатралтә усзуҩцәа Реидгыла, Урыстәыла аус ацура Ахаҭарнакреи Ихььыԥшым Аҳәынҭқаррақәа Реиҩызара иалоу атәылақәа-алахәылақәа Рпарламентбжьаратәи Ассамблеиеи ацхыраареи адгылареи рыла имҩаԥысуеит.
Аԥсны Аурыс драматә театр ари афестиваль алахәхара алыршахеит Аԥсни Урыстәылеи ркультура Аминистррақәеи Аԥсны иҟоу Урыстәыла аус ацура азы Ахаҭарнакреи Санкт-Петербург акультура азы акомитети иҟарҵаз адгылара иабзоураны.
Ф.А. Искандер ихьӡ зху Аҳәынҭқарратә аурыс театр (Искандер итеатр) — Аԥсны уаҳа здаҟам аурыс театр ауп. Уи аԥҵан 1981 шықәса рзы. 2016 шықәса раахыс атеатр аҿиара аетап ҿыц иалалеит, иахьа уи Аԥсны атеатралтә процесс аҿы иԥхьагылоу театрны иҟоуп. Шықәсык ала жәаба инарзынаԥшуа аԥхьарбарақәа ҭыжьуа, иреиӷьу урыстәылатәи арежиссиорцәеи атеатралтә специалистцәеи аус рыцура алыршо, Искандер итеатр аспектакльқәа рхаҭабзиара шьаҭанкыла аиӷьтәра адагьы аспектакльқәа ирҭаауа рхыԥхьаӡара акырынтә аизырҳар алнаршеит. Атеатр ирацәаны, қәҿиарала агастрольқәа нанагӡоит. Урыстәыла акультура Аминистрра апрограмма «Агастроль дуқәа» иалахуп, зыхь нагоу жәларбжьаратәи афестивальқәа рахь ааԥхьарақәа ласы –лассы иаиуоит. Атеатр иахьатәи арепертуар аҿы иҟоуп аурыс, аԥсуа, аҳәаанырцәтәи аклассикеи антикатә авторцәеи ҳаамҭазтәи апиесақәеи рыла иқәыргылоу 25 спектакль ыҟоуп.
