Аҟәа. Ԥхынҷкәынмза 21, 2022 шықәса. Аԥсныпресс. Ареспубликатә хәышәтәырҭа ахшараиуратә ҟәша аҿы аиҭашьақәыгыларатә усурақәа мҩаԥысуеит. Мышқәак раԥхьа аҵыхәтәантәи ашықәсқәа рзы аус зымуаз, ахшара зауз аҳәса рзы аҽыкәабарҭақәа рҿы шьаҭанкыла аиҭашьақәыргыларатә усурақәа хыркәшахеит, ҳәа адырра ҟанаҵоит агәабзиарахьчара Аминистрра апресс-маҵзура.
Аԥсны агәабзиарахьчара Аминистрра ахшараиуратә ҟәша ианаҭеит амедицинатә ҭҵаарақәа рзы ихымԥадатәиу ашьақәыргылага. Уи аԥшқақәа рҿы апаталогиақәа заанаҵы раарԥшра алнаршоит.
Аппарат ахәышәтәырҭа ахь анагара еиҿикааит агәабзиарахьчара аминистр Едуард Быҭәба.
