1992-1993 шықәсқәа рзы Аԥсны аџьынџьтәылатәи еибашьра аан Амиран Ҭаниеи Софа Агәмааи автортә программа «Аччареи алаӷырӡи» ала аибашьцәа ргәы ашьҭыхразы рҿаԥхьа иқәгылон.
20-декабря-2022
ԤХЫНҶКӘЫНМЗА 20 РЗЫ ЛИРА АМШ АЗГӘАЛҬОИТ АԤСНЫ ЖӘЛАР РАРТИСТКА СОФА АГӘМАА.
Аҟәа. Ԥхынҷкәынмза 20, 2022 шықәса. Аԥсныпресс. Ԥхынҷкәынмза 20 – Аԥсны жәлар рартистка, Аҿартә театр асахьаркыратә напхгаҩы Софа Агәмаа лира Амш ауп. Софа Агәмаа атеатр аҿылусура ашықәсқәа ирылагӡаны 70 инареиҳаны арольқәа налыгӡахьан, асахьаркыроу ахаҿқа аԥылҵахьан. Уи дахьыхәмархьоу аспектакльқәа иреиуоуп Уилиам Шекспир ирҿиамҭақәа рыла (апиеса «Отелло» аҿы Емилиа лроль, апиеса «Король Лир» аҿы Регана лроль), Антон Чехов ирҿиамҭақәа рыла (апиеса «Предложение» аҿы Наталиа лроль ), Федерико Гарсиа Лорки ирҿиамҭақәа рыла (апиеса «Кроваваиа свадьба» аҿы аҭаца лроль), уҳәа убас ирацәаны ашәҟәыҩҩцәа рырҿиамҭақәа рыла иқәыргылаз аспектакльқәа лхы алалырхәхьеит.
Ахәаԥшцәа рхаҿы иаанхеит иара убас уи акино аҿы иналыгӡахьоу арольқәагьы. Убас ала, Аԥсны Жәлар рартистка абарҭ афильмқәа рҿы арольқәа зеиӷьаҟам ала иналыгӡахьан: «Время счастливых находок» (акиностудиа Мосфильм, арежиссиор Генрих Габаи, 1969 шықәса), «Белый башлык» (Довженко ихьӡ зхоу акиностудиа, арежиссиор Владимир Савелиев, 1975 шықәса), «У самого Черного моря» (акиностудиа Мосфильм, арежиссеиорцәа Алеқсандр Кузнецов, Оскар Никич, 1975 шықәса), «В ночь на новолуние» (акиностудиа Мосфильм, арежиссиор Иусуп Данииалов).
