05-декабря-2022

ԤХЫНҶКӘЫНМЗА 9 - 10 РЗЫ АУРЫС ДРАМАТӘ ТЕАТР АҾЫ АСПЕКТАКЛЬ «СОФИЧКА» АԤХЬАРБАРА МҨАԤЫСРАНЫ ИҞОУП.

Аҟәа. Ԥхынҷкәынмза 5, 2022 шықәса. Аԥсныпресс. Ф. И. Искандер ихьӡ зху Аҳәынҭқарратә драматә театр аҿы 42-тәи атеатралтә сезон аҩбатәи аԥхьарбара азы аҽазыҟаҵарақәа мҩаԥысуеит.

Асезон ҿыц жьҭаарамза 29 рзы имҩаԥысыз амоноспектакль «В лучах» ала  иаатит. Ԥхынҷкәынмза 9 – 10 рзы Аурыс драматә театр ахәаԥшцәа ирыднагалоит Фазиль Искандер иҩымҭа ала иқәыргылоу аспектакль  «Софичка» аԥхьарбара.

«Софичка» - Чагем ақыҭа инхо аԥҳәызба лыԥсҭазаара аҭоурых зҳәо ажәабжь ауп. Ажәабжь зыхҳәаау лыԥсҭаазаара аҭоурых аарԥшуа Фазиль Искандер зеиӷьаҟам ала ихадоу ауаҩытәыҩсатә хәдуқәа дрыхцәажәоит:  ацәаҩашәа, аԥсҭазаара аҵаки ахықәки, абзиабара, гәык ала азыҟазаара, анажьара. «Софичка» - ари XX ашәышықәса азы ажәлар иуадаҩыз рыԥсҭазаара иазку аепикатә ԥҵамҭа ду ауп. 

Атеатр адиректор хада Иракли Хьынҭәба ишазгәеиҭаз ала, «аҩымҭа зыхҳәаау Софичка длыхцәажәо, Фазиль Искандер ҳара, иахьатәи аамҭазы инхо ҳәажәлар рдоуҳатәи рыԥсҭазааратәи хәдуқәа реизакырҭа Аҩны -Аԥсны ахьчареи аиқәырхареи ахымԥадатәра азы адырра ҳаиҭоит». 

«Ҳара ҳтеатр Фазиль Искандер ихьӡ ахыуп. Убри аҟнытә уи арепертуар аҟны жәаҳәарада  ҳџьынџьуаҩ ду ирҿиамҭақәа рыла иқәыргылоу  аспектакльқәа ыҟазар ахәҭоуп. Фазиль Искандер  ирҿиара излауа ала аӡыргара  аҭахуп, избан акәзар, уи адунеи иарбан ҭыԥзаалак аҿы инхо аԥхьаҩ аԥсуа жәлар агәы ҳәа изышьҭоу аҭаԥшра илнаршоит. Дахьынхозаалакгьы ауаҩы, Фазиль Искандер иҩымҭақәа данрыԥхьалак, аԥсуаа  заку жәлару, руникалра хыҵхырҭас иамоу, адунеизегьтәи акультуратә, ацивилизациатә процесс аҿы иааныркыло аҭыԥи инарыгӡо ароли ртәы шьахәла еиликаауеит», - ҳәа иҳәеит Иракли Хьынҭәба.  

«Софичка» уажәтәи ақәыргыламҭа, акыр ақәҿиарала имҩаԥысыз Шьукин ихьӡ зху Атеатралтә институт Аԥсуа курс адипломтә спектакль ашьаҭала иаԥҵахоит. Аха Аурыс драматә театр аԥхьарбара – иуникалу асценографиеи аҭоурыхтә костиумқәеи ареквизити, иара убас алашара исахьарку ақәырԥхаразы апрофессионалтә сахьаҭыхыҩ зцу зынӡа иҿыцу аспектакль ауп.  Аспектакль арежиссиор – Аԥсуа курс асахьаркыратә напхгаҩы, апедагог, Аԥсны Аҳәынҭқарра Зҽаԥсазтәыз акультура аусзуҩ Елена Одинцова.

 

 


Прочитано 834 раз Последнее изменение 05.12.2022
Image
Image
Image
Image
Информационное Агентство "АПСНЫПРЕСС" (РГУ "АПСНЫМЕДИА") © 2024
Все права на любые материалы, опубликованные на сайте, защищены в соответствии с абхазским и международным законодательством об авторском праве и смежных правах. Использование любых аудио-, фото- и видеоматериалов, размещенных на сайте, допускается только с разрешения правообладателя и ссылкой на www.apsnypress.info.