сегодня
Аԥсны Апарламент аиҳабы ихаҭыԥуаҩ Асҭамыр Аршба напхгара зиҭо аделегациа Аахыҵ Уаԥстәыла ахада заанаҵтәи иалхрақәа рымҩаԥгараҿы жәларбжьаратәи анаԥшцәа иреиуоуп
Абри атәы аанацҳауеит Аԥсны Апарламент апресс-маҵзура.
Алхрақәа мҩаԥысуеит цәыббрамза 18 рзы.
Аделегациа аилазаара иалоуп – адепутатцәа Ерик Рштуни, Галуст Трапизониан, Ешсоу Дочиа.
Иахьа Аԥснытәи аделегациа идикылеит Апарламент ахантәаҩы Алан Маргиев. Иара Аԥснытәи иколлегацәа иҭабуп ҳәа реиҳәеит ареспубликазы асҟак зҵазкуа амш аҽны иахьааз азы, инаҵшьны иазгәеиҭеит Аԥсны аиашьаратә жәлар еснагь рааигәа ишыҟоу, иагьазгәеиҭеит аҩ-тәылак рыжәларқәа рҭоурыхтә лахьынҵақәа рзеиԥшра.
Аԥсны Апарламент адепутатцәа ракәзар, ҭабуп ҳәа рарҳәеит гәыблыла иахьрыдыркылаз азы, иагьырҳәеит ас еиԥш аҭоурыхтә мшазы Аахыҵ Уаԥстәыла аиашьаратә жәлар рааигәара аҟазаара ишеигәырӷьо.
Аԥснытәи аделегациа алахәылацәа инаҵшьны иазгәарҭеит Аԥсны ишыргәалашәо 1992-1993 шш.Аԥсны Жәлар Рџьынџьтәылатә еибашьра иалахәыз Аахыҵ Уаԥстәылатәи хатәгәаԥхарала еибашьуаз, урҭ рфырхаҵара ахаангьы ишырхамышҭуа.
Аиԥылара алахәылацәа ареспубликақәа рпарламентқәа рыбжьара ишьақәгылаз аусеицура иалацәажәеит, уи активла аҿиара азгәарҭеит.
Аԥсны Жәлар Реизара адепутатцәа Агәрагара аадырԥшит Аахыҵ Уаԥстәыла Ахада заанаҵтәи иалхрақәа ареспублика азакәанԥҵареи еицрыдыркылахьоу жәларбжьаратәи астандартқәеи инарықәыршәаны қәҿиарала ишымҩаԥысуа ала.
Аԥснытәи аделегациа Аахыҵ Уаԥстәыла атәылауаа зегьы ирзеиӷьаршьеит аманшәалареи аҭынч жәҩани.
Аиԥылара иара убас иалахәын Аахыҵ Уаԥстәыла иҟоу Аԥсны ацҳаражәҳәаҩ Алан Елбакиеви Апарламент адепутатцәа Сослан Гагиеви Инал Цховребови.
