Items filtered by date: Ахәаша, 02 Лаҵара 2025

Аҟәа. Лаҵарамза 2, 2025 шықәса. Аԥсныпресс. Аԥсны Ахада Гәынба Бадра Урыстәыла зҽаҧсазтәыз артист, Аԥсны жәлар рартист, Москва - Аҟәа ареис ала иааз раҧхьатәи апассаџьырцәа ируаӡәкыз Гыцԥҳа Алиса дылԥылеит.

Асас аԥсшәа лаҳәо, иҭабуп ҳәа леиҳәеит аҟазара аҿиараҟны, абаҩхатәра змоу аҿар адгылара  рыҭараҟны ллагаламҭазы, иара убас  Гыцԥҳа Алиса зымҽхак ҭбаау акультуратә проект, еиуеиԥшым атәылақәа рҟынтә абаҩхатәра злоу аҿар еидызкыло - Жәларбжьаратәи амузыкатә лабораториа аҳәаақәа ирҭагӡаны.

Аҟәа. Лаҵарамза 2, 2025 шықәса. Аԥсныпресс. Иналукааша аҳәынҭқарратә усзуҩ, Ар рԥыза, Аԥсны Афырхаҵа, Ахьӡ-аԥша I аҩаӡара аорден занашьоу аинрал-леитенант Сергеи Дбар  иԥсы ҭаны дыҟазҭгьы лаҵарамза 2 рзы 79 шықәса ихыҵуан.  Иара идунеи иԥсахит 2002 шықәса рзы, 56 шықәса дшырҭагылаз.

Аибашьрақәа зегьы ицәырыргоит ахатә фырхацәеи ар рыԥхьагылаҩцәеи. Убас иагьыҟалеит 1992-1993 шш. Аԥсны жәлар Рџьынџьтәылатәи еибашьрагьы. Араҟа арратә ус аҿы илаз аҟыбаҩ зеиӷьаҟам ала иааирԥшит Аԥсны Арбџьармчқәа Рыштаб Хада аиҳабы Сергеи Платон-иԥа Дбар.   

Атәылахьчара Аминистрра анапхгараҭара, Арбџьармчқәа рыруаа иахьа Аԥсны Афырхаҵа ҳаҭырла дыргәаладыршәеит, Аҟәа ақалақь, Ахьӡ-Аԥша апарк аҿы игылоу уи ибаҟа амҵан ашәҭ шьыҵәрақәа шьҭарҵеит.

Лаҵарамза 2, 1946 шықәсазы Мгәыӡырхәа ақыҭан диит заб игәараҭа еснагь иҭҭәааз, зхәыҷра ашықәсқәа ақыҭаҿы изхызгаз, еснагь аччареи ахәмарреи згымыз, зшьапы зыжәлар рԥеиԥш азы иеихызгаз, зцәажәара, зхәыцра, змилаҭ рҭоурых иузаҟәымҭхо иадызҳәалоз, Аԥсны ашәарҭа ианҭагылоз зыбжьы аӷьеҩҳәа изыргоз, ҳарбџьармчқәа ҵәатәы шьаҟаны ирыҵагылаз аибашьҩы-аинрал, Аԥсны Афырхаҵа Сергеи Платон-иԥа Дбар.

1963 шықәсазы иара Мгәыӡырхәатәи абжьаратә школ далгеит, уи ашьҭахь дхәыҷы аахыс ҩызас имаз В. Д. Ҭарбеи иареи Азербаиџьантәи ССР Иреиҳаӡоу Асовет ахьӡ зху Бақәатәи иреиҳаӡоу азеиԥш арратә ҵараиурҭа иҭалеит. 1968 шықәсазы уи қәҿиарала ихиркәшеит, авзводи, аротеи, абаталиони ркомандирс дыҟан. 1972 шықәсазы Баикалнҭыҵтәи арратә округ арота акомандҟаҵаҩыс ддәықәҵан, уи ашьҭахь  амотохысратә баталион акомандаҟаҵаҩыс, ахыԥсаҟьага-артиллериатә батареиа акомандаҟаҵаҩыс дыҟан. 1977 – 1979 шш.  Германиа асовет архәҭақәа реилазаараҿы абаталион акомандаҟаҵаҩ иаҳасабала арратә маҵзура дахысуан. 1979 ш. Фрунзе ихьӡ зху Арратә академиа азыӡырҩыс дыҟан, Аеҵәа ҟаԥшь аорденқәа дыркавалерын, Германиеи, Венгриеи, Ефиопиеи реиҳабыратә ҳамҭақәа ианаршьахьан, Аԥсны аиҳабыра иҟарҵаз аҳәарала, 1990 шықәсазы Сергеи Дбар арратә комиссарс дҟаҵан. Ақырҭуа-аԥсуа еибашьра ианалага инаркны уи Аҟәа ахьчара напхгара аиҭон.

Аҟәа. Лаҵарамза 2, 2025 шықәса. Аԥсныпресс. Аҳәынҭқара Ахада Гәынба Бадра Урыстәлеи Аԥсни Жәлар рартист, Б. Шьукин ихьӡ зху Атеатртә институт аректор, атеатри, акинои, ателехәаԥшреи рактиор Евгени Книазев дидикылеит.

Аиԥылара мҩаԥысит аҳаиреимадара Москва-Аҟәа аартра инамаданы, Евгени Книазев актәи апассаџьырцәа дыруаӡәкхеит. Аиԥылара иара убас иалахәын Урыстәылатәи Афедерациа Ахада Иусбарҭа ауаажәларратә проектқәа рзы аиҳабы ихаҭыԥуаҩ Александр Журавски.