Апроект аҿы иарбоуп анхарҭатә зинтә еизыҟазаашьақәа рышьақәгылареи рынагӡареи рҿы аҭыԥантәи ахаланапхгара аусбарҭақәа инарыгӡо ароль, аҳәынҭқарратә мчра аусбарҭақәеи аҭыԥантәи ахаланапхгаратә усбарҭақәеи рзинмчы алкаауп.

Апроект аҿы иаҳәоит аҳәынҭқарра иаус хаданы ишыҟоу атәылауаа зегьы рзы анхарҭа апроблема аӡбара амеханизмқәа раԥҵара, аиҳаракгьы заагарҭа маҷу, урҭ иӷару ркатегориахь иаҵанамкуазаргьы.

Иҟоу ауалафахәи ахарџьқәеи ҳасаб азуны уахәаԥшуазар, иахьа анхарҭаҭыԥ аахәара акыр иуадаҩу, мамзаргьы зынӡа изалыршамхо усны иҟалоит. Убри аҟнытә анхарҭаҭыԥ ала аиқәыршәара апроблема аӡбараҿы ихадоу ароль назыгӡо аҳәынҭқарра ауп. Уи ацхыраара зҭахыҵәҟьо ауааԥсыра адгылара рыҭара ԥхықәраны иадлоит.

Анхарҭатә закәанеидкыла апроект аҿы иарбоуп еиуеиԥшым аформақәа змоу аԥаразоужьрақәеи (адотациақәа), азинҷыдақәа рыҭареи, иара убас иалкаау акатегориақәа ирыҵанакуа атәылауаа анхарҭаҭыԥ аахәаразы ипроцентдоу акредит рыҭара.

Ус иҟоу рзы Анхарҭатә закәанеидкыла ахқәа руак аҿы иарбахоит аилкаара – икоммерциатәым аԥсахра. Иҷыдоу аҭыԥ ааннакылоит ауадарацәа змоу аҩнқәеи амазара аобиектқәеи хәҭалатәи рыргылара азҵаара.

Анхарҭатә закәанеидкыла иалагалоуп ауадарацәа змоу аҩнқәы рнапхгараҭара аиҿкаара атәы зҳәо ахы. Убри азы анхара-ргыларатә кооператив, анхарҭатә кооператив, анхарҭа ампыҵакҩцәа реиҩызара, уҳәа реиԥш иҟоу аиҿкаарақәа аԥҵахар ауеит.

Апроект аҿы урҭ русура аиҿкаара аԥҟарақәа арбоуп. Иара убас апроект аҿы ауааԥсыра аипотека ала анхарҭақәа раахәара азы алшареи анхарҭатә фонд аилазаара аиҿкаашьеи арбоуп.