Ауаажәларратә шәарҭадара амилициа Амаҵзура ала  имҩаԥган 220 аӡбаратә процессқәеи 69 акультура-массатә усмҩаԥгатәқәеи.

746-ҩык аџьатә мигрантқәа  2023 шықәсазы  Гагра араион аҿы  административтә хьырхәра иақәыршәан. Еиқәыршәаны аӡбарҭахь идәықәҵан 229 материал, урҭ рылҵшәақәа рыла 24 – ҩык адепортациа рзыруит.

Амилициа аусзуҩцәа Аҳәынҭқарратә шәарҭадара Амаҵзура аҟынтәи рколлегацәа рыцырхырааны 2023 шықәсазы ирыԥшааит амхрагьы мҩаԥыргеит 530 маининг-аппаратқәа. Акриптовалиута арҳара иазку аппаратқәа  Аԥсны Аҳәынҭтеххылаԥшра аамҭалатәи ашьҭаҵараҭа ахь идәықәырҵеит.

2023 шықәсазы Гагра араион аҿы иҟалаз 60 амҩа-транспорттә машәыртә хҭысқәа рҿы 13 –ҩык ҭахеит.

Зынӡа иҳаҩсыз ашықәс азы араион амҩақәа рҿы Аҳәынҭавтоинспекциа  аусзуҩцәа ишьақәдыргылеит 12 241 амҩаҿы аныҟәара аԥҟарақәа реилагара иадҳәалоу ахҭысқәа. Урҭ рахьынтә 470 хҭыс ижәны амашьына аԥсҟы акра иадҳәалан.  

2022 шықәсазы Гагра араион аҿы иаарԥшын  9035 зинеилагара; 663-ҩык амашьынарныҟәцаҩцәа ижәны, мамзаргьы анаркотикатә маҭәашьар рыдкыланы амашьына аԥсҟы акра азы административтә хьырхәра иақәыршәан.

Гагра араион аҩныҵҟатәи аусқәа Русбарҭа Цандрыԥшьтәи амилициа аҟәша ахылаԥшра аҵаҟа иҟоу аҵакыра аҿы аҳасабырбатә аамҭахәҭа иҭагӡаны ашәҟәы иҭагалахеит 43 цәгьоура, урҭ рахьынтә иаартуп 40.

Пицунда ақалақь аҿы аҳасабырбатә аамҭахәҭа иҭагӡаны ашәҟәы иҭагалан 13 цәгьоура, урҭ рахьынтә иаартуп 10, уи убасҵәҟьа хра злоу адинамика шыҟоу аанарԥшуеит. 

Гагра аҩныҵҟатәи аусқәа Русбарҭа Бзыԥтәи амилициа аҟәша иҳаҩсыз ашықәс 12 мзы рыла ашәҟәы иҭанагалеит ашьаус ҟазшьа змоу ацәгьоурақәа  9, зегьы раартра алыршахеит.  2022  шықәсазы ашәҟәы иҭагалан 15 цәгьоура.

Аҩныҵҟатәи аусқәа рминистр Гагра араион аҩныҵҟатәи аусқәа Русбарҭа акадртә еиқәыршәара аганахьала аусура арӷәӷәара азы анапынҵақәа ҟаиҵеит.

Аминистр ицны аилатәара рхы аладырхәит иара убас аминистр актәи ихаҭыԥуаҩ Руслан Ажьиба, аминистр ихаҭыԥуаҩ Беслан Ҷкадуа.

Аҩныҵҟатәи аусқәа Рминистрра анапхгаҩцәа рнапаҵаҟа иҟоу ахырхарҭақәа рыла азгәаҭарақәак ҟарҵеит.

Руслан Ажьиба  аоператив-ԥшааратә усура арӷәӷәара азы азԥхьанҵа ҟаиҵеит.

Беслан Ҷкадуа Гагра араион Аҳәынҭавтоинспекциа аусура ԥсыҽуп ҳәа иазгәеиҭеит.

Аилатәара зхы алазырхәыз Гагра араион апрокурор Беслан Пкьыни араион Ахада ихаҭыԥуаҩ Адамыр Цышбеи  аҩныҵҟатәи аусқәа Русбарҭа анапхгаҩцәеи аусзуҩцәеи рымадареи  аус рыцуреи аҩаӡара шыҳараку азгәарҭеит.

Аилатәара аихшьаалақәа рыла, аҩныҵҟатәи аусқәа рминистр ахатәы еилазаара анапынҵа риҭеит ахырхарҭақәа зегьы рыла русура дырӷәӷәарц, уи алҵшәақәа рзы аҟәшақәеи аҟәшеиҵақәеи рнапхгаҩцәа есыҽны адырра аҟаҵара рыхәҭаны иҟоуп.