Аҟәа. Ажьырныҳәамза 12, 2024 шықәса. Аԥсныпресс. Жәабранмза 10 рзы Екатеринбург ақалақь аҿы имҩаԥысраны иҟоуп апрофессионалтә бокс азы атурнир (RCC Boxing Promotions), ҳәа адырра ҟанаҵоит Sport.rambler.ru. Ари аспорт абзиабаҩцәа урыстәылатәи апроспект Харитон Агрбеи (12-0, 8 КО) аԥышәа змоу аргентинатәи аспортсмен Марселино Николас Лопеси (37-4-1, 22 КО) реиндаҭлара рбараны иҟоуп. Урҭ реиԥылара мҩаԥысуеит зықьҩыла ауаа зкуа Акультура-гәырҿыхаратә Комплекс «Уралец» арена аҿы.
Жәларбжьаратәи акласс змоу Урыстәыла аспорт азҟаза Харитон Агрба 2019-шықәса анҵәамҭазы апрофессионалтә бокс ахь дыиасит, убри аамҭа инаркны иара знык иадамзаргьы даҵамхаӡацт. Ԥшьышықәса рыла иара 12 еиндаҭлара мҩаԥигеит, 12 иааира игеит, урҭ рахьынтә ааба ҽҳәараанӡа, аӡбаратә ҭаҩрақәа рҿы раундк аҿгьы даҵамхаӡацт.
Марселино Николас Лопес — аверсиа WBC ала Лаҭынтәи Америкаа ачемпион, Аладатәи Америка изныкымкуа иачемпионхьоу аспортсмен иоуп. Иара иигахьоу 37 иааира рҟынтәи 22 анокаут ала игеит, убри аан иара ихаҭа ҽҳәараанӡа зныкгьы даҵамхаӡацт, есымша аҵыхәтәанынӡа деисуеит.
