Аҟәа. Ажьырныҳәамза 12, 2024 шықәса. Аԥсныпресс. Ажьырныҳәамза 19 – 20 рзы Воронежтәи афилармониа асценаҿы дықәгылоит Урыстәыла зҽаԥсазтәыз артистка, Аԥсны жәлар рартистка Алиса Гыцба, ҳәа адырра ҟанаҵоит Аԥсны акультура Аминистрра апресс-маҵзура.
Авокалистка иналыгӡоит италиатәи акомпозитор Џьакомо Пуччини иопера «Тоска» аҟынтәи еицырдыруа Тоска иариа.
Иара убас афилармониа азал аҿы иқәгылараны иҟоуп Алиса Гыцба лаԥшьгарала имҩаԥгаз жәларбжьаратәи амузыкатә конкурс алауреатцәа Софиа Сақаниа (сопрано), Мариа Самусева (меццо-сопрано), Леонард Ланс (тенор), Никита Каиацки (тенор), Владислав Бириуков (баритон).
